Ադրբեջանական APA լրատվական գործակալության փոխանցմամբ՝ Թուրքիան պլանավորել է մոտ ժամանակներս Ադրբեջանում բացել ռազմական արդյունաբերության գրասենյակ։ Դրանում ներկայացված է լինելու այն ընկերությունների արտադրանքը, որոնք մտնում են Թուրքիայի ռազմաարդյունաբերական կոմպլեքսի մեջ։
Ակնկալվում է, որ գրասենյակի բացման արարողակարգին մասնակցելու են Թուրքիայի կառավարության բարձրաստիճան անձինք։ Այդ գրասենյակը ոչ միայն Կովկասում ու Կենտրոնական Ասիայում կներկայացնի Թուրքիայի ռազմական արդյունաբերությունը, այլև կնպաստի տարածաշրջանում թուրքական ընկերությունների կապերի հաստատմանը։ Գրասենյակը նաև խորհրդատվական ծառայություններ է մատուցելու։
Նշվում է, որ Թուրքիան պլանավորել է այս տարի արտահանել ավելի քան 1 միլիարդ դոլարի ռազմական արտադրանք։ Ներկայումս Ադրբեջանի հետ առևտրային և գործընկերային հարաբերություններ են պահպանում Թուրքիայի ռազմական արդյունաբերության ոլորտում ներկայացված ավելի քան 20 թուրքական ընկերություններ։
Հիշեցնենք, որ Թուրքիան համանման գրասենյակներ է բացել նաև ԱՄՆ-ում ու Քաթարում։