Ադրբեջանական Salam News գործակալությանը տված հարցազրույցի ժամանակ ադրբեջանցի ռազմական փորձագետ Յաշար Ջաֆարլին անդրադարձել է Ղարաբաղում պատերազմի հնարավոր վերսկսման խնդիրներին.
«Լեռնային Ղարաբաղում ռազմական գործողությունների վերսկսման դեպքում Ադրբեջանի ռազմական բյուջեն կգերազանցի 20 միլիարդ դոլարի սահմանագիծը։ 2011 թվականին Ադրբեջանի ռազմական ծախսերը կազմելու են ավելի քան 3.5 միլիարդ դոլար։ Ներկայիս դրությամբ, Ադրբեջանի բացառապես ռազմական բյուջեն կազմում է 1 միլիարդ մանաթ, իսկ ռազմական ծախսերը կազմում են Ադրբեջանի պետբյուջեի 19.2 տոկոսը։
Ներկայումս բյուջեում նախատեսված այդ գումարները հաշվարկված չեն ռազմական գործողություններ վարելու համար։ Այսօր Ադրբեջանի արժութային պաշարները կազմում են մոտ 30 միլիարդ դոլար։ Եվ եթե պատերազմ սկսվի, Ադրբեջանը դրան կուղղի նավթային եկամուտների ողջ ծավալը»։
Հիշեցնենք, որ Խաղաղության խնդիրների ուսումնասիրության Ստոկհոլմի ինստիտուտի (SIPRI) տվյալներով, 2010 թվականին Ադրբեջանի պաշտպանական ծախսերը կազմել են 1 միլիարդ 421 միլիոն դոլար, Վրաստանինը՝ 452 միլիոն դոլար, իսկ Հայաստանինը՝ 404 միլիոն դոլար:
2000-2010 թվականներին Ադրբեջանն ընդհանուր առմամբ պաշտպանական ոլորտին հատկացրել է 9 միլիարդ 215 միլիոն դոլար, Վրաստանը՝ 4 միլիարդ 317.6 միլիոն դոլար, իսկ Հայաստանը՝ 2 միլիարդ 630 միլիոն դոլար: