Վրաստանում ձերբակալված ռուսական լրտեսների կապակցությամբ նոր սենսացիոն բացահայտումներ է արել «Московский комсомолец»-ը: Ըստ պարբերականի` այդ գործով անցնող հիմնական դերակատարներից մեկը, որի խոստովանական ցուցմունքները Թբիլիսին ներկայացնում է որպես գլխավոր ապացույցներից մեկը, իրականում 10 տարուց ավելի է` վրացական հատուկ ծառայությունների գործակալ է: Այս մասին ռուսական պարբերականին հայտնել է Վրաստանի պետանվտանգության նախարարության նախկին մի պաշտոնյա, որը պնդում է, թե անձամբ է զբաղվել այդ անձի «հավաքագրմամբ»:
Խոսքը աջար գործարար Պետրե Դևրիշաձեի մասին է, ով ռուսական քաղաքացիություն ունեցող չորս ձերբակալված լրտեսներից մեկն է (մյուս ինը Վրաստանի քաղաքացիներ են): Վրաստանի ներքին գործերի նախարարության` օրերս տարածած տեսանյութի մեջ Դևրիշաձեն մանրամասն պատմում է, թե ինչպես են 2006 թ. նրա հետ կապի մեջ մտել ռուսական ԳՀՎ-ի ներկայացուցիչները և շանտաժի միջոցով ստիպել աշխատել իրենց համար:
Վրացական մամուլը նաև հայտնել էր, որ Պետրե Դևրիշաձեն եղել է Աջարիայի նախկին առաջնորդ Ասլան Աբաշիձեի թիկնազորում: