Թերթի տեղեկություններով՝ իշխող Հանրապետական կուսակցությունը որոշել է առաջիկա խորհրդարանական ընտրություններում սահմանափակել իր կոալիցիոն գործընկեր «Բարգավաճ Հայաստան» կուսակցության կողմից մեծամասնական ընտրակարգով ընտրվելիք պատգամավորների քանակը:
«Այսինքն՝ ԲՀԿ-ն կարող է խնդիրներ ունենալ մեծամասնական այն ընտրատարածքներում, որտեղ նախկինում առաջադրվել և հաղթել են իր անդամները»,- գրում է թերթը և հավելում. «Սովորաբար, մեծամասնական տեղերի հետ կապված՝ իշխանական կուսակցությունները պայմանավորվածություն են ձեռք բերում, և մեկը մյուսի դեմ թեկնածու չի առաջադրում»:
Իշխանությանը մոտ կանգնած թերթի աղբյուրների փոխանցմամբ՝ այս անգամ մեծամասնականի դեպքում ՀՀԿ-ն, թեկուզ ոչ բացահայտ, բայց իր ներկայացուցիչներն է առաջադրելու ԲՀԿ-ի թեկնածուների դեմ: ՀՀԿ փոխնախագահ Գալուստ Սահակյանը երեկ «168 ժամ»-ի թղթակցի հետ զրույցում չի ցանկացել մեկնաբանել այս լուրը՝ ասելով, «Ես կասեմ ոչ թե իմ, այլ ՀՀԿ-ի պաշտոնական տեսակետը, որ մեր կուսակցությունը դեռ խորհրդարանական ընտրություններին վերաբերող հարցեր չի քննարկել: Դա կանենք կամ 2011-ի ավարտին, կամ էլ 2012-ի սկզբին»: