Հոկտեմբերի 11-ին ՀՀ մշտական ներկայացուցիչ, դեսպան Կարեն Նազարյանը հանդիպում է ունեցել ՄԱԿ-ի գլխավոր քարտուղարի գենդերային հավասարության և կանանց առաջխաղացման հարցերով տեղակալ Միշել Բաշելեի հետ:
Հանդիպման օրակարգում էին ԳՔ տեղակալի գրասենյակի և ՄԱԿ-ի Կանանց կարգավիճակի հանձնաժողովի միջև փոխգործակցության, հանձնաժողովի գալիք նստաշրջանի անցկացման և, առհասարակ, ազգային մակարդակներում գենդերային հավասարության քաղաքականության իրականացման մեխանիզմների շուրջ քննարկումները:
Որպես ՄԱԿ-ի սոցիալական ու տնտեսական խորհրդի՝ նշված կարևորագույն ֆունկցիոնալ հանձնաժողովի նախագահող, դեսպան Նազարյանը հույս է հայտնել, որ տիկին Բաշելեի նորաստեղծ գրասենյակը հանձնաժողովին կտրամադրի անհրաժեշտ աջակցություն և մասնագիտական ներգրավվածություն, կանանց իրավունքների պաշտպանության ու կարգավիճակի բարձրացման խնդիրների իրագործմանն ուղղված գործառույթները լավագույնս կատարելու համար:
Կարեն Նազարյանը Միշել Բաշելեին հրավիրել է մասնակցել և ելույթ ունենալ հանձնաժողովի բացմանը, որը նախատեսված է 2011թ. հունվարի 4-ից փետրվարի 22-ը Նյու Յորքում:
Արտաքին գործերի նախարարություն
