Հայաստանի իշխանական աղբյուրներին մոտ կանգնած «Առաջին լրատվական»-ի աղբյուրները հայտնում են, Հայաստանում Իրանի Իսլամական հանրապետության դեսպանատունը ՀՀ նախագահի աշխատակազմին տեղեկացրել են, որ հունիսի 6-ին Երևան ժամանող Իրանի Իսլամական Հանրապետության նախագահ Մահմուդ Ահմադինեժադը ցանկություն ունի հանդիպելու ՀՀ երկրորդ նախագահ Ռոբերտ Քոչարյանին։ Ահմադինեժադի ցանկության մասին ԻԻՀ դեսպանն արդեն հայտնել է նաև Ռոբերտ Քոչարյանի գրասենյակին։
Այս օրերին, ՀՀ իշխանությունները փորձելու են ամեն ինչ անել Ահմադինեժադի օրակարգից Ռ. Քոչարյանի հետ նախատեսված հանդիպումը հանելու համար, սակայն դա կարծես նրանց չի հաջողվելու։
Ենթադրվում է, որ Քոչարյանի ու Ահմադիժադի հանդիպման օրակարգը լինելու է ղարաբաղյան կարգավորման և Հայաստանի ներքաղաքական կյանքում սկսված նոր գործընթացները։
Հիշեցնենք, որ պաշտոնը թողնելուց հետո Ռոբերտ Քոչարյանը 2010թ. հունվարի 21-ին հանդիպել էր Իրանի նախագահ Մահմուդ Ահմադինեժադի հետ։
Հանդիպման ընթացքում Ահմադինեժադը հայտարարել էր, որ երկու երկրները պետք է ակտիվ մասնացեն տարածաշրջանային գործընթացներին, քանի որ նրանք տարածաշրջանում կայունություն և խաղաղություն հաստատելու պոտենցիալ ունեն:
Իր հերթին Քոչարյանն ընդգծել էր, որ հայկական կողմը շահագրգռված է Իրանի հետ կապերի զարգացմամբ ու ամրապնդմամբ:
«Թեհրանն ու Երևանը երկկողմ կապերը զարգացնելու և տարածաշրջանային համագործակցության մակարդակը բարձրացնելու ներուժ ունեն»,- անցյալ տարի Իրանի նախագահի հետ հանդիպման ժամանակ ասել էր Քոչարյանը: