Եվրոպա լիգայի խաղարկության պատմության մեջ առաջին անգամ «Մանչեսթեր Յունայթեդը» կխաղա եզրափակչում: Կիսաեզրափակչի պատասխան խաղում «Յունայթեդը» սեփական հարկի տակ մեծ ճիգերի գնով ոչ-ոքի՝ 1:1 խաղաց «Սելտայի» հետ, որին առաջին խաղում հաղթել էր 1:0 հաշվով:
«Օլդ տրաֆորդ» մարզադաշտում առաջին կեսում «Յունայթեդը» վատ չխաղաց, և կարելի է ասել՝ վերահսկում էր հանդիպման ընթացքը: Խաղադաշտում ամենաակտիվ և գրագետ խաղ ցուցադրող խաղացողներից էր Հենրիխ Մխիթարյանը, ով ակտիվ մասնակցություն ունեցավ նաև գոլային գրոհին: Մեր ֆուտբոլիստը ստացել է 7.4 բալ և այս ցուցանիշով զբաղեցրել երկրորդ հորիզոնականը՝ զիջելով միայն հանդիպման լավագույն ֆուտբոլիստ ճանաչված Ֆելաինին, ով ստացել է 7.7 բալ: Մխիթարյանի երեք անցումները դաշտի կենտրոնում ուղղակի հիացմունք պատճառեցին հազարավոր երկրպագուների:
Նշենք, որ պաշտպանության ձախ եզրում անհաջող գործեց Դարմիանը, ինչի հետևանքով մեր ֆուտբոլիստը գրոհներին մասնակցելուց բացի՝ կատարում էր նաև եզրային պաշտպանի պարտականությունը: Վստահ ենք՝ եթե «Յունայթեդը» պաշտպանությունում խնդիրներ չունենար, ապա Մխիթարյանի գործողությունները առջևի գծում շատ ավելի սուր և արդյունավետ կլինեին:
Մոուրինյոն բնականաբար տեղյակ էր, որ Դարմիանը պատրաստ չէ հանդիպմանը և ստիպված էր Մխիթարյանին օգտագործել հենց ձախ եզրում: Նշենք, որ այս պահին պաշտպանության ձախ եզրում Մոուրինյոն այլընտրանք չունի, քանզի Էշլի Յանգն ու Լյու Շոուն վնասվածք ունեն: Սա առաջին դեպքը չէր, երբ Դարմիանի՝ խաղադաշտում լինելու ժամանակ Մխիթարյանը ստիպված է լինում խաղալ նաև պաշտպանությունում:
Ինչևէ, իսպանական թիմի հետ խաղում կարելի է առանձնացնել նաև Պոգբային, ով խաղաց կիսապաշտպանության կենտրոնում: Ֆրանսիայի հավաքականի կիսապաշտպանը, պահելով գնդակը, ժամանակ էր տալիս մյուս ֆուտբոլիստներին դիրքավորվելու: Եթե ձախ պաշտպան Դարմիանը ուղղակի պատրաստ չէր պայքարին, ապա աջ եզրում թիմի ավագ Վալենսիան կատարեց թե պաշտպանի և թե եզրային կիսապաշտպանի պարտականությունը: Նոմինալ եզրային կիսապաշտպան Ջեսի Լինգարդը հերթական անգամ չափազանց թույլ խաղ ցուցադրեց: Նրա գործողությունների 90 տոկոսը խոտան էր: Ըստ էության Վալենսիան խաղաց նաև Լինգարդի, իսկ Մխիթարյանը՝ Դարմիանի փոխարեն:
Հանդիպման ավարտից 15 րոպե առաջ, երբ թվում էր՝ «Յունայթեդն» արդեն եզրափակչում է, Մոուրինյոն, չգիտես ինչու, փոխարինեց Մխիթարյանին՝ նրա փոխարեն խաղադաշտ դուրս բերելով երրորդ հենակետային կիսապաշտպանին՝ Կարիկին: Անգլիական թիմը հանդիպումը սկսել էր երկու հենակետային կիսապաշտպաններով: Խաղային այս դիրքում գործում էին Էրերան և Ֆելաինին:
Մխիթարյանի հեռանալուց հաշված րոպեներ անց «Յունայթեդը» հատկապես ձախ եզրում ուղղակի տապալվեց: Նկատելով, որ ձախ եզրը ուղղակի ազատ միջանցք է, հյուրերը ուժերը կենտրոնացրին խաղադաշտի հենց այս հատվածի վրա: Հանդիպման 85-րդ րոպեին հենց ձախ եզրում Կարիկի «քթի տակից» կատարվեց գոլային փոխանցումը, իսկ մրցավարի կողմից ավելացված 5-րդ րոպեին նույն դիրքից կատարված փոխանցումը կարող էր ճակատագրական լինել «Մանչեսթեր Յունայթեդի» և Մոուրինյոյի համար: Պորտուգալացի մասնագետը խուճապի մատնվելով՝ հանդիպման վերջին րոպեներին փոխարինեց նաև Լինգարդին և Ռեշֆորդին՝ խաղադաշտ դուրս բերելով փորձառու Ռունիին և կենտրոնական պաշտպան Սմոլինգին: Թե որքան մարդու մազեր սպիտակեցրեց Մոուրինյոն, փոխարինելով Մխիթարյանին և տապալելով «Յունայթեդի» խաղը, դժվար է ասել:
Ինչևէ, մայիսի 24-ին Ստոկհոլմում կկայանա Եվրոպա լիգայի խաղարկության եզրափակիչը «Մանչեսթեր Յունայթեդի» և Ամստերդամի «Այաքսի» միջև: Նշենք, որ Մոուրինյոն որպես գլխավոր մարզիչ արդեն իսկ 6 անգամ հանդիպել է «Այաքսի» հետ և նույնքան հաղթանակ տարել:
«Ես երջանիկ կլինեմ, եթե նվաճենք Եվրոպա լիգայի գավաթը: Արդեն իսկ տիրացել ենք Անգլիայի լիգայի գավաթին: Մրցաշրջանում երկու տիտղոսը, կարծում եմ, լուրջ հաջողություն կլինի: Կարիերայիս ընթացքում սա ամենածանր մրցաշրջանն էր: Շնորհակալություն եմ հայտնում մեր թիմի ֆուտբոլիստներին, ովքեր հերոսաբար պայքարում են»,- հայտարարել է Մոուրինյոն «Սելտայի» հետ հանդիպումից հետո:
Հաջորդ հանդիպումը «Մանչեսթեր Յունայթեդն» անցկացնելու է մայիսի 17-ին՝ Անգլիայի Պրեմիեր լիգայի 37-րդ տուրի շրջանակներում հյուընկալվելով «Տոտենհեմին»:
