Այսօր լրագողների հետ հանդիպման ժամանակ ԱԺ աշխատանքի և սոցիալական հարցերի մշտական հանձնաժողովի նախագահ Հակոբ Հակոբյանը և տնտեսագետ Թաթուլ Մանասերյանը խոսեցին կենսաթոշակային նոր համակարգի մասին։ Հ. Հակոբյանը նշեց, որ կենսաթոշակային ֆոնդերը պետք է ինդեքսացվեն սպառողական գներով։ Այսինքն՝ պետությունը երաշխավորում է, որ աշխատողների այսօր կուտակած գումարները (որպես կենսաթոշակ) 20-30 տարի հետո կվերադարձվեն նրանց՝ հաշվի առնելով այդ տարիների գնաճը (ինդեքսավորում)։
Թ.Մանասերյանն այնուհետև նշեց, որ պետք է ինդեքսավորվեն նաև աշխատավարձերը։ «Այսօրվա գործող օրենքներով ինդեքսավորումը նաև աշխատավարձի հետ կարող ենք առնչել, բայց դարձյալ տեսնում ենք, որ պրակտիկայում մենք չունենք ինդեքսավորում»,- ասաց Թ.Մանասերյանը։
«Մենք այսօր չունենք ոչ մի օրենք, որ մեզ պարտադրի աշխատավարձ ինդեքսավորել»,- արձագանքեց Հ.Հակոբյանը։ «Կենսապահովման նվազագույն զամբյուղի մասին օրենքը հստակ ֆիքսում է դա, պարտադրվում է, որ եռամսյակը մեկ հաշվարկը կատարվի, հաշվի առնվի արժեզրկումը»,- ասաց Թ.Մանասերյանը։
Սրան ի պատասխան՝ Հ.Հակոբյանը նշեց, որ կենսապահովման նվազագույն զամբյուղ հաշվել ու հաշվի առնել՝ չի նշանակում աշխատավարձ ինդեքսավորել։ «Օրենքը չի պարտադրում մեզ ինդեքսավորել ոչ նպաստը, ոչ էլ աշխատավարձը։ Օրենքը պարտադրում է հաշվի առնել, ու վերջ»,- ասաց պատգամավորը։