2010 թվականին խաղող վերամշակող ընկերությունների կողմից մթերվել է 16 մլրդ 789.1 մլն դրամի խաղող, որի դիմաց առ այսօր վճարվել է 16 մլրդ 740.7 մլն դրամ: Այս մասին «Առաջին լրատվական»-ին տեղեկացրին ՀՀ գյուղատնտեսության նախարարությունից։
Ներկայումս չվճարված է մնացել ընդամենը 39.5 մլն դրամ, որից 36 մլն դրամը՝ «Գրեյթ Վելլի» Հ/Ձ ՍՊԸ-ի, 1.5 մլն դրամը՝ «Արենի» գինու գործարան ՓԲԸ-ի, 2 մլն դրամը՝ «Արփա Ալկո» ՍՊԸ-ի կողմից:
Վերը նշված ձեռնարկությունների ղեկավարները հավաստիացրել են ՀՀ գյուղատնտեսության նախարարությանը, որ մինչև սույն թվականի հունիսի 15-ը պարտքերն ամբողջությամբ կմարվեն։ Մասնավորապես, «Գրեյթ Վելլի» Հ/Ձ ՍՊԸ-ն պարտքը կմարի մինչև հունիսի 10-ը, «Արենի» գինու գործարան ՓԲԸ-ն և «Արփա Ալկո» ՍՊԸ-ն՝ մինչև հունիսի 15-ը:
Նշենք նաև, որ ըստ գյուղատնտեսության նախարարության՝ նախորդող տարիներին մթերված բանջարեղենի և պտղի դիմաց հանրապետության վերամշակող ընկերությունները պարտքեր չունեն: