ՀՀԿ խմբակցության քարտուղար Էդուարդ Շարմազանովը ողջունեց Դովիլում ԵԱՀԿ ՄԽ համանախագահող երկրների նախագահների հայտարարությունը ԼՂ հարցի կարգավորման վերաբերյալ և նկատեց, որ այն համահունչ է հայկական պետության դիրքորոշման հետ. «Մենք բազմիցս շեշտել ենք, որ ուժի կիրառումն անթույլատրելի է, մենք կողմնակից ենք խնդրի բացառապես խաղաղ կարգավորմանը, ավելին՝ ասել ենք, որ ուժի կրկնակի կիրառումը աղետալի կլինի այն կիրառող երկրի համար, և մենք միշտ մեր հասարակությանը պատրաստել ենք խաղաղության, ոչ թե պատերազմի, ինչը չենք կարող ասել Ադրբեջանի վերաբերյալ»:
Շարմազանովը նաև ընդգծեց, որ Ադրբեջանի արտգործնախարարության արձագանքը դովիլյան հայտարարությանը ցույց է տալիս, որ նրանք պատրաստ չեն ընդունել այդ հայտարարությունը:
Կազանում հունիսին կայանալիք Սարգսյան-Մեդվեդեև-Ալիև հանդիպման ժամանակ որևէ գործընթացի հիմք դնելու համար, ըստ Շարմազանովի, կարևոր է Ադրբեջանի մոտեցումը, սակայն Ադրբեջանն ասում է մի բան, անում՝ մեկ այլ բան. «Հայկական կողմերն ասել են, որ իրենք պատրաստ են երեք սկզբունքների հիման վրա իրականացնել բանակցություններ, բայց Ադրբեջանը, մասնավորապես վերջին տարիներին իր ղեկավարի գլխավորությամբ իրականացնում է ապակառուցողական քայլեր, և դրա վառ ապացույցը նրանց արտգործնախարարության արձագանքն էր դովիլյան հայտարարությանը»:
ՀՀԿ-ական պատգամավորի խոսքերով, ժամանակն է, որ Ադրբեջանը ցույց տա՝ ինքը կառուցողակա՞ն է, թե՞ ոչ. «Իսկ կառուցողական լինել՝ նշանակում է, որ Ադրբեջանը պետք է հաշտվի Արցախի ժողովրդի ինքնորոշման իրավունքի իրացման հետ»: