Սյունիքի մարզի թիվ 38 ընտրատարածքում ինքնառաջադրված թեկնածու Վահրամ Հովհաննիսյանը մտադիր է հանել իր թեկնածությունը: «Առաջին լրատվական»-ի հետ զրույցում Վահրամ Հովհաննիսյանը նշեց, որ ինքնաբացարկի մասին Կենտրոնական ընտրական հանձնաժողովին կտեղեկացնի սահմանված կարգով` օրենքով նախատեսված թույլատրելի ժամկետում: Թեկնածությունը հանելու պատճառները Հովհաննիսյանը չմանրամասնեց` միաժամանակ նշելով. «Լուրջ պատճառ չկա»:
Սյունիքի մարզի թիվ 38 ընտրատարածքում առաջադրված պատգամավորության երեք թեկնածուներից նախընտրական հիմնադրամներ բացել են միայն երկուսը: Հայաստանի հանրապետական կուսակցության կողմից առաջադրված Արմեն Կարապետյանը 300 հազար դրամի նախընտրական մուտք է կատարել, որից ծախսերը կազմել են 298 800 դրամ: Վերջինս այլևս պայմանագրային պարտավորություններ չունի: «Ժառանգություն» կուսակցության կողմից առաջադրված Սամվել Հայրապետյանը 100 800 դրամի նախընտրական մուտք է կատարել, նույնքան էլ կազմել է ծախսերի չափը, մնացորդ չկա: Թեկնածուների ծախսերի թույլատրելի չափը 10 մլն դրամ է: Ինքնառաջադրված թեկնածու Վահրամ Հովհաննիսյանը նախընտրական հիմնադրամներ չի բացել:
2013 թ. սեպտեմբերի 29-ին Սյունիքի մարզի թիվ 38 ընտրատարածքում կանցկացվի ՀՀ ԱԺ մեծամասնական ընտրակարգով լրացուցիչ ընտրություն: Նման որոշում ԿԸՀ-ն ընդունել է հուլիսի 15-ին` հիմք ընդունելով ՀՀ ԱԺ նախագահի «ՀՀ ԱԺ պատգամավոր Վահե Հակոբյանի պատգամավորական լիազորությունները դադարած լինելու մասին» արձանագրությունը: Նախընտրական քարոզարշավը մեկնարկել է սեպտեմբերի 1-ին, կավարտվի սեպտեմբերի 27-ին: Թեկնածուներն ինքնաբացարկի մասին դիմում կարող են ներկայացնել մինչև սեպտեմբերի 19-ը:
