Ռուսաստանի նախագահ Պուտինն ունի ինչպես կոմունիստներին, այնպես էլ ռուս թագավորներին բնորոշ գծեր: Նման կարծիք է հայտնել բրիտանացի պատմաբան Օռլանդո Ֆայջեսը Stern գերմանական պարբերականին տված հարցազրույցում:
«Այն, որ Ռուսաստանում իշխանությունը ստանձնել է հին համակարգի անդամ և ԿԳԲ-ի աշխատակից, զարմանալի չէ: Ինձ համար ավելի հետաքրքրական է այն, որ Պուտինը մի կողմից՝ բոլշիևկյան ավանդույթի հետևորդ է, մյուս կողմից՝ նա 12 տարի առաջ թույլ տվեց Ռուսաստան վերադարձնել գեներալ Դենիկինի մնացորդները, որը կռվել է թագավորի կողմից ընդդեմ բոլշևիկների»,- ասել է Ֆայջեսը՝ հավելելով, որ Պուտինն ամենից շատ վախենում է գոյություն ունեցող կարգի դեմ հարձակումից, ուստի ապահովագրում է իրեն բոլոր կողմերից:
Լինելով ԿԳԲ-ի գործակալ՝ Պուտինը հետևում է չեկիստների ավանդույթներին, որոնք խաղադրույք էին կատարում հսկողության և ահաբեկման վրա՝ ընդդիմությանը կանխելու համար: Այդ նույն ավանդույթի համաձայն՝ այսօր Ռուսաստանում վախենում են իրավապաշտպան կազմակերպություններից և սոցցանցերից, այսինքն՝ քաղաքացիական հասարակությունից, որն անվերահսկելի է՝ ասել է նա: Պատմաբանի կարծիքով՝ Պուտինի նման գործելաոճը նման է Լենինի գործելաոճին:
Պուտինն ընդունել է նաև Նիկոլայ 1-ինի կերպարը: Եվ իրոք, նրանց մեջ շատ նմանություններ կան: Օրինակ՝ Նիկոլայը 19-րդ դարում փորձում էր իր երկիրն ապահովագրել Արևմուտքից, որը համարում էր մեծագույն չարիք: Նա Ռուսաստանին սահմանակից եվրոպական երկրները համարում էր իր ազդեցության գոտի: Նիկոլայի գաղափարախոսությունն էր «ուղղափառություն, անսահմանափակ միապետություն, ժողովրդականություն»: Նույնը կարելի է ասել նաև Պուտինի գաղափարախոսության մասին:
Պատասխանելով այն հարցին, թե ինչն է միավորում Ռուսաստանին, Ֆայջեսն ասել է. «Երբ Բորիս Ելցինը ստանձնեց իշխանությունը և փորձեց Ռուսաստանը վերածել նոր ազգության, այլ ոչ թե կայսրության, նա գիտակցեց, որ ռուսներին այդքան էլ շատ բաներ չեն համախմբում: Պուտինն այլ ճանապարհով ընթացավ. նա իր համահայրենակիցներին շնորհեց հզորագույն երկրին պատկանելու զգացողություն, ըստ ամենայնի, նրանց շնորհեց ինքնություն: Բայց իրականում երկիրը թույլ է, գտնվում է տնտեսական վատ վիճակում և ժողովրդագրական ճգնաժամ է ապրում»,- եզրափակել է պատմաբանը:
