Վրացական GHN լրատվական գործակալության փոխանցմամբ, վրացական ընդդիմության առաջնորդներից, խորհրդարանի նախկին խոսնակ Նինո Բուրջանաձեն, խոսելով ընդդիմության ցույցի ցրումից, հայտարարել է, որ Սաակաշվիլիի նպատակն իրեն վարկաբեկելն է.
«Սաակաշվիլիի թիվ մեկ նպատակը մշտապես հանդիսացել է ինձ վարկաբեկելը, սակայն դա նրան չի հաջողվել։ Ճշմարտությունը մշտապես հաղթում է։ Նրանք ստիպված են ցուցադրել այն կադրերը, որոնք վկայում են, որ ոչ մի ընդդիմադիր առաջնորդ չի լքել ցուցարարներին ու փախուստի դիմել։
Երբ ես եկա հանրապետական հիվանդանոց, այնտեղ գտնվում էին տուժածների ընտանիքները, և ոչ ոք չհանդիմանեց ինձ։ Բոլորն ասացին, որ պայքարը շարունակելու են, և պետք է ավարտին հասցնել սկսված պայքարը»։
Հիշեցնենք, որ մայիսի 27-ին Սաակաշվիլին, անդրադարձ կատարելով Բուրջանաձեի սկանդալային հեռախոսազրույցին, հայտարարել էր. «Բուրջանաձեի և նրա համակիրների թիկունքում կանգնած են կայսերական մեծ հավակնություններ ունեցող երկրի (Ռուսաստանի) մեծ բանակը, անվտանգության մեծ ծառայությունը, կաշառքի ու նավթի մեծ պաշարները, ինչից էլ նրանք կորցնում են գլուխները:
Եթե իշխանափոխության պլանների հղացումը վերաբերեր միայն տեղական ոչնչություններին, ապա ես նրանց լուրջ չէի ընդունի: Բայց երբ մենք գիտենք, թե ովքեր են կանգնած այդ պլանների ետևում, լուրջ ենք ընդունում նահանջել չցանկացող այդ ուժերին»:
