ԱՄՆ-ն Հայաստանի տնտեսության իրական հատվածում կատարած ներդրումների ծավալով թվով 6-րդ երկիրն է` Ռուսաստանից, Ֆրանսիայից, Նիդեռլանդներից, Արգենտինայից ու Գերմանիայից հետո: Այս տարվա առաջին կեսին ԱՄՆ-ն Հայաստանի տնտեսության իրական հատվածում կատարել է ընդամենը 12 մլն դոլարի ներդրումներ: Իսկ արտաքին ապրանքաշրջանառության ծավալով (արտահանումը և ներմուծումը միասին) ԱՄՆ-ն 7-րդն է` Ռուսաստանից, Չինաստանից, Բուլղարիայից, Գերմանիայից, Իրանից ու Ուկրաինայից հետո: Հայաստանի ու ԱՄՆ-ի ապրանքաշրջանառությունը այս տարվա առաջին 9 ամիսներին կազմել է 145 մլն դոլար: Հիշեցնենք, որ այս պահին «Արմենիա Մարիոթ» հյուրանոցում տեղի է ունենում հայ-ամերիկյան միջկառավարական հանձնաժողովի հերթական նիստը, որի ընթացքում քննարկվում են գործարարության համար նպաստավոր միջավայրի ձևավորման, մակրոտնտեսական իրավիճակի գնահատման, հարկային և մաքսային քաղաքականության և վարչարարության, որակի միջազգային ստանդարտների ներդրման, արդար և հավասար մրցակցությանն առնչվող հարցեր: