Ռուսաստանի նախագահ Վլադիմիր Պուտինը շատ է հպարտանում Սիրիայում իր բանակի գործողություններով՝ գրում է Թոբին Հարշոուն BloombergView պարբերականում: Բացի այդ, Պուտինն այս կերպ գովազդում է ռուսական զենքը: «Իհարկե, չպետք է բաց թողնել այս հնարավորությունը, որպեսզի ամրապնդենք մեր դիրքերը սպառազինության համաշխարհային շուկայում»,- ասել է Պուտինն այս շաբաթ ռուսական պաշտպանական ընկերությունների հետ հանդիպմանը:
Նա նաև նշել է, որ աշխարհում հայտնվել է ռուսական սպառազինություն գնելու աննախադեպ ցանկություն իրական մարտական պայմաններում, այդ թվում՝ Սիրիայում, զենքի արդյունավետ կիրառման արդյունքում:
«Չնայած Պուտինը հպարտ ելույթներ է ունենում, դժվար չէ դրանցում նկատել հիասթափության նոտաներ: Ռուսական արտադրության զենքի վաճառքը, որը վերջին տարիներին զգալի աճել էր, այժմ ստագնացիա է ապրում: Եվ դա տեղի է ունեցել ոչ ճիշտ ժամանակին, երբ նավթի գները ամայացնում են երկրի տնտեսությունը՝ ռազմական ներուժի զանգվածային հզորացման ֆոնին»,- գրում է հոդվածագիրը:
Փորձագետների գնահատմամբ՝ 2005-2013թթ. Ռուսաստանի զենքի համաշխարհային վաճառքը երեք անգամ աճել է, բայց այդ ժամանակահատվածից հետո կամ ամեն տարի նվազել է, կամ մնացել է նույն մակարդակի վրա:
Սերգեյ Դենիսենցևը, որը տվյալ ոլորտի առաջատար փորձագետներից մեկն է, Վաշինգտոնում ռազմավարական և միջազգային հետազոտությունների կենտրոնում պարզաբանել է ռուսական զենքի վաճառքի նվազման պատճառները. առաջին հերթին՝ Չինաստանը և Հնդկաստանը, որոնք ավանդաբար գնում են արտահանվող ռուսական արտադրության զենքի շուրջ կեսը, սկսել են սեփական սպառազինությունն արտադրել: Երկրորդ խոշոր շուկան՝ Վիետնամը, անցած տարվանից բաց է ամերիկյան ընկերությունների համար: Եվ երրորդ՝ նավթի ցածր գները նվազեցրել են Ադրբեջանի, Ալժիրի, Նիգերիայի գնողունակությունը, որոնք ևս ռուսական արտադրության զենքի խոշոր գնորդներ են:
