Հայոց ցեղասպանության 102-րդ տարելիցի կապակցությամբ Դոնալդ Թրամփի հայտարարությունը ուղղված էր Թուրքիային՝ գրում է The Hill պարբերականը:
«Թրամփի հայտարարությունը կարևոր ժեստ էր՝ ուղղված Թուրքիային, որը Միացյալ Նահանգների գործընկերն է ՆԱՏՕ-ում և ԴԱԻՇ ահաբեկչական խմբավորման դեմ պայքարում: Չէ՞ որ Թուրքիայի կառավարությունը պայքարում է ընդդեմ այն բանի, որպեսզի 1915թ. Օսմանյան իշխանությունների գործողությունները կոչվեն ցեղասպանություն»,- գրում է հոդվածագիրը՝ հավելելով, որ այս կերպ Թրամփը հարգել է զոհված 1.5 միլիոն հայերի հիշատակը, բայց հրաժարվել է «ցեղասպանություն» եզրույթից, ինչպես ԱՄՆ նախկին նախագահները:
«Այսօր մենք հիշում և ոգեկոչում ենք 20-րդ դարի վատթարագույն զանգվածային վայրագություններից մեկի՝ Մեծ եղեռնի տառապանքների բովով անցածներին: 1915թ. սկսած՝ Օսմանյան կայսրության վերջին տարիների ընթացքում մեկուկես միլիոն հայեր զոհ են գնացել տեղահանություններին, կոտորածներին ու մահվան երթերին: Ես միանում եմ Ամերիկայի հայկական համայնքին և աշխարհասփյուռ հայությանը՝ սգալու կորսված մարդկային անմեղ կյանքերի ու կրած բազում տառապանքների վիշտը»,- ասել էր Թրամփը:
The Hill-ը հիշեցնում է, որ ԱՄՆ նախկին նախագահները, այդ թվում՝ Բարաք Օբաման, զերծ են մնացել «ցեղասպանություն» եզրույթի կիրառումից:
Ինչ վերաբերում է ԱՄՆ գործող նախագահ Դոնալդ Թրամփին, ապա վերջինս կարծես թե փորձում է սերտ հարաբերություններ հաստատել Թուրքիայի իշխանությունների հետ՝ գրում է The Hill-ը և հիշեցնում, որ ամերիկացի նախագահը անցած շաբաթ զանգահարել և շնորհավորել է Ռեջեփ Թայիփ Էրդողանին սահմանադրական հանրաքվեի արդյունքների կապակցությամբ: Ավելի ուշ Սպիտակ տունը հայտարարել է, որ երկու երկրների ղեկավարները քննարկել են ահաբեկչության դեմ համատեղ պայքարը՝ եզրափակում է հոդվածագիրը: