Երևանի քաղաքապետարանի մարզական միջոցառումների կանոնակարգի համաձայն, հուլիսի 10 -ից մեկնարկել էր Երևանի քաղաքապետի գավաթի «Առողջ սերունդ`պաշտպանված հայրենիք» համաքաղաքային բակային ավանդական փառատոնը, որի նախնական փուլին այս տարի ներգրավված էին մայրաքաղաքի բոլոր վարչական շրջանների 295 թիմեր` 4389 մասնակիցներով:
Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնում են, որ թվով 84 թիմերի 636 երեխաներ տարբեր մարզաձևերից իրենց ուժերն են չափել նաև եզրափակիչ փուլերում: Մրցումները կազմակերպվել են 7 մարզաձևերից` շաշկի, շախմատ, վոլեյբոլ, հանդբոլ, հեծանվավազք, բասկետբոլ և ֆուտբոլ: Առաջինից երրորդ տեղեր գրաված թիմերի ներկայացուցիչները պարգևատրվել են դիպլոմներով ու մեդալներով,իսկ առաջին տեղ գրաված թիմերը՝ նաև գավաթներով:
Փառատոնին ընդհանուր հաշվարկով 57 միավորով երրորդ տեղն է զբաղեցրել Կենտրոն վարչական շրջանը, երկրորդ տեղում 60 միավորով հանգրվանել է Շենգավիթ վարչական շրջանը:
63 միավորով առաջին տեղը գրավել և Երևանի քաղաքապետի փոխանցիկ գավաթին է արժանացել Մալաթիա-Սեբաստիա վարչական շրջանը: Հաղթող թիմին գավաթը հանձնել է Երևանի քաղաքապետի տեղակալ Արամ Սուքիասյանը: Երևանի քաղաքապետ Տարոն Մարգարյանի անունից շնորհավորելով փառատոնի մասնակիցներին, հաղթող թիմերին, ծնողներին ու մարզիչներին, քաղաքապետի տեղակալ Արամ Սուքիասյանը նշել է, որ նման միջոցառումները կլինեն շարունակական, իսկ երևանյան մարզադպրոցները, որոնցից շատերն արդեն հաճախում են փառատոնի մասնակից երեխաները, տարեցտարի կդառնան ավելի նորոգ ու բարեկարգ: Երևանի քաղաքապետարանի կողմից անցկացվող մարզական միջոցառումների գլխավոր նպատակը դեռահասների ու պատանիների շրջանում առողջ ապրելակերպի սերմանումն է:
