Թուրքիայի առաջատար TRT և երաժշտական մի շարք ալիքներով մի քանի շաբաթ է ցուցադրվում է Հավհաննես Շիրազի «Նամակ» բանաստեղծության հիման վրա գրված երգի տեսահոլովակը, որն արդեն հիթ է դարձել Թուրքիայում:
Երգը կատարում է թուրքահայ երգչուհի Սիբիլ Բեկթորոսօղլուն, ով նախկինում երգել է «Սուրբ Վարդանանց» երգչախմբում:
Նկատենք, որ Սիբիլի «Նամակ»-ը (Namag) հնչում է խանութներում, Ստամբուլի փողոցներում: Երգչուհին մեկ առիթով նշել է, որ ինքը երազել է, որպեսզի իր երգի տեսահոլովակը ցուցադրվի թուրքական հեռուստաալիքներով:
«Նամակ» երգի տեսահոլովակի ռեժիսորն է թուրք հայտնի կլիպմեյքեր Օզքան Աքսուլարը:
Ի դեպ, նախորդ տարի նոյեմբերին լույս էր տեսել Սիբիլի «Սիբել» ալբոմը` բաղկացած 12 երգերից, որում ընդգրկված են նաեւ «Տեր ողորմյա» և «Կիլիկիա» երգերը, իսկ ալբոմի առաջին երգը հենց «Նամակ»-ն է։
