Մեկնարկել է ֆուտբոլի Ռուսաստանի երրորդ դիվիզիոնի առաջնությունը, որին մասնակցում է նաև Մոսկվայի նորաստեղծ «Արարատը»: Մոսկովյան գոտու մրցաշարում առաջին իսկ խաղում «Արարատը» 1:0 հաշվով առավելության է հասել «Զելենոգրադի» նկատմամբ: Հաղթական գնդակը խփել է բաշկիր ֆուտբոլիստ Սուլեյման Աբդուլինը: Հայկական ակումբում հանդես են գալիս բացառապես Ռուսաստանի քաղաքացիություն ունեցող ֆուտբոլիստներ: Նրանց թվում, սակայն, կան նաև ազգությամբ հայեր՝ Արսեն Ակոպով, Սերգեյ Ավագիմյան, Արտակ Ալեքսանյան, Արթուր Ալեքսանյան, Ալբերտ Մնացականյան, Ալեքսանդր Քերոբյան:
Նշենք, որ 27-ամյա պաշտպան Ավագիմյանը ժամանակին հանդես է եկել Երևանի «Արարատում», ինչպես նաև Հայաստանի ազգային հավաքականում: Հայաստանի բարձրագույն խմբի առաջնությունում հանդես է եկել նաև Մոսկվայի «Արարատի» ավագ Արտակ Ալեքսանյանը: Նա խաղացել է «Փյունիկում», «Ուլիսում», «Գանձասար-Կապանում», ինչպես նաև մի քանի անգամ հրավեր է ստացել մեր ազգային թիմից: Մոսկվայի «Արարատի» գլխավոր մարզիչը 31-ամյա Արկադի Իմրեկովն է:
Ռուսաստանում հայկական ֆուտբոլային ակումբի ստեղծումը երկրպագուների շրջանում ոչ միանշանակ արձագանք է ստացել: Մասնավորապես, շատերը այն կարծիքի են, որ Ռուսաստանում հայկական թիմ ունենալը պարզապես անմտություն է և ֆինանսական ռեսուրսների վատնում: Հայաստանի բարձրագույն խմբի առաջնությունում այսօր խաղում են ընդամենը վեց թիմեր, և երկրպագուների մի հատվածը վստահ է, որ շատ ավելի օգտակար և նպատակահարմար կլիներ մեր երկրում նոր թիմի ստեղծումը: Շատերի մոտ էլ դժգոհություն է առաջացրել այն, որ «Արարատում» ընդամենը մի քանի հայ ֆուտբոլիստներ են ընդգրկված:
Ինչ խոսք, ցանկալի կլիներ, որ Հայաստանի բարձրագույն խմբի առաջնությունում թիմերի քանակն ավելանար, սակայն Մոսկվայի «Արարատի» նախագիծը կարող է զգալիորեն նպաստել հայկական ֆուտբոլի զարգացմանը: Այդ դիտարկմանը, թե ինչու են «Արարատում» խաղում հիմնականում այլազգի խաղացողներ, նշենք, որ այսօր ոչ միայն Ռուսաստանում, այլև Հայաստանում կա հայ ֆուտբոլիստների պակաս: Հայաստանի բարձրագույն խմբի շատ թիմերում այսօր տոն են տալիս լեգեոներները:
Մոսկվայի «Արարատը» դրսևորվելու դաշտ է Ռուսաստանում բնակվող հայ ֆուտբոլիստների համար: Ակումբի նպատակն է ժամանակի ընթացքում ձևավորել մարտունակ թիմ, որտեղ կխաղան հիմնականում հայ ֆուտբոլիստներ: Այսօր Ռուսաստանում ավելի շատ հայեր են բնակվում, քան Հայաստանում: Կարելի է ասել, որ Ռուսաստանում հայկական թիմի առկայությունն ինչ-որ տեղ նաև անհրաժեշտություն էր:
Նշենք, որ «Արարատի» մարզաշապիկը խորհրդային ժամանակաշրջանի լեգենդար «Արարատի» գույներն ունի: Հիմնական գույներն են դեղին-սև, արտագնա մարզաշապիկը՝ կարմիր-կապույտ: Դարպասապահի մարզաշապիկը՝ սև: Մարզաշապիկների վրա պատկերված է Արարատ լեռը, որն օգտագործված է նաև ակումբի խորհրդանիշի վրա, իսկ թևքերին պատկերված են ռուսական զարդանախշեր: Ակումբը հիմնվել է Մոսկվայի հայ երիտասարդների ասոցիացիայի կողմից:
Հաջորդ հանդիպումը «Արարատը» անցկացնելու է ապրիլի 19-ին՝ հյուրընկալվելով «Չերտանովո» թիմին: «Զելենոգրադի» հետ հանդիպմանը մարզադաշտում ներկա են գտնվել մի քանի հարյուր հայ երկրպագուներ և հնչեցրել ««Արարատ», հուպ տուր» հայտնի վանկարկումը: