Խոսելով մենաշնորհի և օլիգարխների դեմ գործող մեխանիզմներից` այսօր Սպառողների ազգային ասոցիացիայի նախագահ Արմեն Պողոսյանը մեզ հետ զրույցում նշեց, որ գոյություն ունի պետական երկու լուրջ կառույց. մեկը կոչվում է Տնտեսական մրցակցության պետական հանձնաժողով, մյուսը՝ Պետեկամուտների կոմիտե ու էլի մի շարք կառույցներ: Սակայն խնդիրն այն է, որ այդ կառույցները պետք է գան ավելի ռացիոնալ և անվրեպ աշխատանքի:
«Գոյություն ունի մեկ ճշմարտություն, որ գերատեսչություններն ունենում են գերատեսչական շահեր, և այդ սկզբունքից ելնելով՝ իմ թվարկած և չթվարկած գերատեսչություններն աշխատում են նվազագույնի հասցնել իրենց աշխատանքի ոլորտը և պատասխանտվությունը: Իսկ եթե նրանք գործեն ավելի անվրեպ, մենք կկարողանանք բացահայտել և զսպել մենաշնորհը ու դրա հետևանքները, որն իրականացվում է շատ թույլ տեմպերով, ոչ լիարժեք: Որ ասեմ, թե չի իրականացվում` սուտ կլինի: Բայց դրա արդյունավետությունը շատ փոքր է: Այստեղ մեծ անելիք ունի հասարակությունը, ՀԿ-ները և մամուլը: Հասարակությունը պետք է ստիպի, որ այդ գերատեսչությունները ծառայեն իրենց բուն նպատակին, որ իրենք իրենց գերատեսչություններին ստիպեն և այս եղանակով փորձենք պայքարել մենաշնորհի և օլիգարխիայի դեմ»,- առաջարկեց Արմեն Պողոսյանը:
