Արցախում աշխատավարձերի 20 տոկոս միջինացված աճ է նախատեսվում: Այս մասին հայտարարել է ԼՂՀ վարչապետը 2014թ.-ի պետբյուջեի բաղադրիչները քննարկելու ժամանակ:
Ստեփանակերտում անցկացվել է 2014-16թթ. միջնաժամկետ ծախսային ծրագրերի մշակման և կառավարություն ներկայացնելու հարցերին նվիրված աշխատանքային խորհրդակցություն՝ պետական կառավարման մարմինների ղեկավարների մասնակցությամբ: Խորհրդակցության ընթացքում Ֆինանսների և էկոնոմիկայի նախարար Սպարտակ Թևոսյանը ներկայացրել է ծախսային ծրագրի մշակման սկզբունքը, տրամաբանությունը և չափորոշիչները:
Ամփոփ ծրագրերը գործադիրի հաստատմանը կներկայացվեն մինչև այս ամսվա կեսը, քանի որ դրանք պետք է ներառվեն 2014թ. պետական բյուջեում, որն էլ պետք է ներկայացվի խորհրդարան:
Ստեփանակերտում խորհրդակցություն է տեղի ունեցել նաև փոխվարչապետ Արթուր Աղաբեկյանի մոտ, որի ընթացքում էլ քննարկվել են սոցիալ-տնտեսական ծրագրերի իրականացման, գյուղատնտեսության, շինարարության և սննդի ու թեթև արդյունաբերության տեղական արտադրության զարգացման ուղղությամբ նոր մեթոդների կիրառման հարցեր:
Փոխվարչապետն անդրադարձել է պետական գույքի արդյունավետ կառավարման փորձերին, թեթև արդյունաբերական և սննդի տեղական արտադրության զարգացման հեռանկարներին, ինչը կարող է լուեծ նաև` զբաղվածության հարցը: Ա. Աղաբեկյանն առաջնորդվել է «Կառավարում» ՓԲԸ գործունեությամբ, որի կազմում առկա է ձեռներեցներին վարձակալության հիմունքով տրամադրելու ենթակա 10 միավոր արտադրական խոշոր նշանակության պետական գույք` Ստեփանակերտում և Շուշիում: Փոխվարչապետը ներկաներին հանձնարարել է ԼՂՀ ՊԲ-ին տեղական գյուղմթերքների և թեթև արդյունաբերական արտադրանքի մատակարարման ոլորտներում կառավարության կողմից առաջարկվող նպաստավոր պայմանների և հարկային արտոնությունների մասին տեղեկացնել անհատ ձեռներեցներին` նոր ծրագրեր սկսելու գործում նրանց շահագրգռելու և ստացվող առաջարկությունները քննարկելու և հաշվի առնելու նպատակով:
Լիցենզավորման նոր պայմաններ կառաջարկվեն նաև տեղական ալկոհոլային խմիչքների արտադրությամբ զբաղվող ձեռներեցներին, մասնավորապես, բնապահպանական փորձաքննություն կկիրառվի միայն առավել խոշոր ծավալների ալկոհոլային խմիչքների արտադրությամբ զբաղվող կազմակերպությունների նկատմամբ:
Փոխվարչապետը նշել է նաև, որ ձեռնարկվող քայլերն ուղղված են ամբողջ հանրապետության տարածքում բիզնես-միջավայրի հավասարաչափ ձևավորմանն ու զարգացմանը, նոր աշխատատեղերի ստեղծմանը:
