Երևանի պետական համալսարանի քաղաքականության և մշակութային ուսումնասիրությունների կենտրոնի տնօրեն, քաղաքական վերլուծաբան Դավիթ Հովհաննիսյանը ԵԱՀԿ Մինսկի խմբի համանախագահող երկրների նախագահների Դովիլում արված համատեղ հայտարարությունը դրական է գնահատում, քանզի ամբողջ տարածաշրջանում իրավիճակը շատ լարված է:
«Կոնֆլիկտների խաղաղ լուծմանն ուղղված նման ճնշումները, կոչերը և մղումները այսօր չափազանց հրատապ են, սակայն մյուս կողմից` ԼՂ կոնֆլիկտի նման կոնֆլիկտների լուծման համար անհրաժեշտ է ոչ միայն մասնակիցների, այլ նաև կոնֆլիկտում շահեր ունեցող բոլոր կողմերի ընդհանուր համաձայնությունը, ինչը ձեռք բերելը չափազանց դժվար է, հատկապես այն պայմաններում, երբ ադրբեջանական կողմն անընդհատ ռազմատենչ հայտարարություններով է հանդես գալիս»,- պարզաբանեց Հովհաննիսյանը:
Նրա գնահատմամբ՝ դովիլյան հայտարարությունը շատ կարևոր էր` հաշվի առնելով, թե ինչ մակարդակում է այն արվում, բայց ամեն դեպքում այն հայտարարություն է, և շատ հնարավոր է՝ կողմերից մեկը, մասնավորապես` Ադրբեջանը, իր ներքին հաշվարկներից ելնելով, չհամաձայնի նախագահների կողմից առաջարկվող քայլերին. «Բնական է, որ նման մոտեցումն արդեն փակուղի է տանում իրավիճակը»:
Հունիսին Կազանում կայանալիք Սարգսյան-Մեդվեդև-Ալիև հանդիպումն, ըստ Հովհաննիսյանի, լինելու է հերթականը, քանզի առկա իրավիճակը չի փոխվել, բացի դովիլյան հայտարարությունից:
Հիշեցնենք, որ Դովիլում Մեծ ութնյակի (G-8) գագաթնաժողովի շրջանակներում ԵԱՀԿ Մինսկի խմբի համանախագահ երկրները համատեղ հայտարարություն են տարածել` կոչ անելով կողմերին բնակչությանը պատրաստել խաղաղության, ոչ թե պատերազմի և հունիսին կայանալիք հանդիպման ժամանակ ավարտին հասցնել հիմնական սկզբունքների մշակման վրա տարվող աշխատանքները:
