«Ղարաբաղ» կոմիտեի անդամ Աշոտ Մանուչարյանից այսօր փորձեցինք հետաքրքրվել, թե քաղբանտարկյալների ազատ արձակումը երկրում նոր իրավիճակ կփոխի՞, թե՞ ոչ: Ինչին ի պատասխան նա արձագանքեց, որ ոչ բոլոր մարդիկ են ներկա դրությամբ ազատ արձակված:
«Մասնավորապես՝ ես մեկ ամիս առաջ մի դպրոցում էի, ուր սովորում էր Սարգիս Հացպանյանի դուստրը: Գիտեմ, թե նա ինչ սպասումներով էր, բայց Սարգիս Հացպանյանն ազատված չէ: Այնպես որ, այն ազատարձակումը, որը կատարվել է, դեռ ազատարձակում չէ, անգամ այնպիսի սահմանափակ եվրոպական արժեքների շրջանակում, որը մենք արտասանում ենք: Անգամ այս շրջանակում այդ մարդկանց պետք է ազատ արձակեին: Պետք է ներողություն խնդրեին նրանցից, որովհետև նրանք կալանավորվել էին անօրեն»,- ասաց Աշոտ Մանուչարյանը:
Ինչ վերաբերում է երկրորդ խնդրին՝ նրա խոսքերով, պետք է հետաքննություն կատարվեր, թե ինչը ինչպես է եղել:
«Հետաքննության մասով մի հատուկ պահ կա, որ կուզենայի նշել: Բանն այն է, որ վերջերս քննող խումբը շարունակում է արտահայտություններ հնչեցնել, որ ինչ-որ մարդկանց սպանելը եղել է զանգվածային անկարգությունների շրջանակում: Այսինքն՝ դա նշանակում է, որ զանգվածային անկարգությունը, որ մտցվել է որպես վարկած, դեռ պահպանվում է անգամ այդ քննչական խմբի կողմից: Իսկ եղել է շատ կարևոր հայտարարություն, չնայած մինչ այդ էլ բոլորիս պարզ էին եղածի երևույթները: Այդ հայտարարությունը եղել է համենայնդեպս այն ժամանակվա նոմինալ ղեկավարի կողմից, սակայն Մյասնիկյանի արձանի մոտ միտինգավորներն ինչ անում էին, նրանք անում էին օրենքի շրջանակում և ոստիկանները կարգ ու կանոնը ևս պահպանում էին օրենքի շրջանակում: Իսկ ինչ վերաբերում է սպանություններին, արյանը, «զանգվածային անկարգություններին»՝ դրանք եղել են շատ ավելի հեռու: Այսինքն՝ հաստատվել է այն վարկածը, որ ինչ-որ ուժեր անց են կացրել քայքայիչ օպերացիաներ ժողովրդի և երկրի դեմ:
Այս հետաքննությունը պետք է անցկացվի, և երևի թե՝ ոչ այս քննչական խմբի կողմից, որովհետև նա առնվազն կատարել է այդ գործի ոչ կոմպետենտ ուսումնասիրություն, իսկ առավելագույնը՝ նա պարզապես եղել է այդ քայքայիչ գործողությունը իրականացնող ուժերի ազդեցության տակ: Եթե նույն տրամաբանությամբ այդ նույն խումբը շարունակի այս ուսումնասիրությունը, դա անընդունելի կլինի:
Իսկ քաղբանտարկյալներն, անկասկած, այս երկրի նվիրյալներն են, որովհետև այն, ինչ կատարվել է այն ժամանակ՝ դա եղել է մեր երկրի, մեր ժողովրդի ապստամբությունն ընդդեմ մեր երկրի դեմ իրականացվող քայքայիչ գործընթացի: Այդ տեսակետից Մարտի 1-ի էջը կարող ենք փակված համարել, երբ անկողմնակալ հետաքննություն կանցկացվի, բոլոր մեղավորները կհայտնաբերվեն, կապամոնտաժվեն և կպատժվեն: Դրանից հետո մենք կհայտարարենք, որ երկրում առաջացել է նոր իրավիճակ՝ քաղբանտարկյալներն էլ ազատ են արձակվել»,- ընդգծեց Աշոտ Մանուչարյանը:
