Ֆիննական Nokia ընկերությունը հումորային երգիծանքով է հանդես եկել՝ նվիրված Android օպերացիոն համակարգի նոր տարբերակի անվանմանը, որը կկոչվի KitKat:
NokiaHomebase-ի Twitter-ի էջում հրապարակվել է երգիծական գովազդ, որում մեջբերվում է KitKat-ի նշանաբանի առաջին մասը՝ «Ընդմիջում արա´»: Սակայն շոկոլադե բատոնի փոխարեն հեղինակները «երկու մասի են բաժանել» Galaxy S3 սմարթֆոնը:
Ավելի վաղ հայտնի էր դարձել, որ Android-ի նոր տարբերակի համար Kit Kat-ի անվանումը հնարավոր է դարձել Nestle ընկերության հետ Google կորպորացիայի գործընկերային համաձայնագրի կնքումից հետո:
Օպերացիոն համակարգի նախկին տարբերակները անվանվել են որևէ քաղցրավենիքի պատվին, սակայն կոնկրետ ապրանքանիշ կիրառվում է առաջին անգամ:
