Irates.am-ը զրուցել է «Հանրապետություն» կուսակցության նախագահ Արամ Սարգսյանի հետ:
Ա. Սարգսյանը Մաքսային միությանը Հայաստանի անդամության հայտը բոլորովին անակնկալ չի համարում, նա կարծում է, որ Հայաստանը ընդամենը իր իրական քաղաքական ու տնտեսական անկախության համար պայքարի նոր փուլ է մտնում, որտեղ բոլորս բավականին փորձ ենք ձեռք բերել և ավելորդ շարժումներ չենք անելու, այլ` միայն նպատակային ու արդյունքներ տվող:
Ի՞նչ ունենք սեպտեմբերի սկզբին իբրև քաղաքական կյանքի ելակետ հարցին նա պատասխանել է.
-Ունենք հայտարարություն, որ Հայաստանը ցանկանում է միանալ Մաքսային, հետո նաև Եվրասիական միությանը, բայց այդ ցանկությունը կարող է մնալ ձևական, քանի դեռ կայացած չեն միությունները: ԵՄ պաշտոնյաներն արդեն արձագանքեցին, որ Հայաստանը չի կարող երկու միությունների անդամության հավակնություններ ունենալ, բայց դուռը փակված չէ, պատրաստ են շարունակելու քննարկումները: Սա, իհարկե, քաղաքավարական ժեստ էր, որովհետև եթե Ասոցացման համաձայնագիրը Սերժ Սարգսյանը չի ստորագրում, իսկ նա արդեն իր ընտրությունն արել է, ուրեմն արևմտյան աշխարհի ավանսով տված վստահությունը մերժում է, ամբողջությամբ տեղափոխվում է այլ բևեռ, վերջանում է թե՛ խաղը, թե՛ կոմպլեմենտարությունը:
-Ի՞նչ պիտի անի ընդդիմությունը:
-Կարող եմ ասել` ի՞նչ է անելու «Հանրապետություն» կուսակցությունը: Առաջիկայում սկսում ենք խորհրդակցություններ այն ընդդիմադիր քաղաքական կուսակցությունների, հասարակական կազմակերպությունների և քաղաքական գործիչների հետ, ովքեր Հայաստանի զարգացումը տեսնում են եվրոպական չափանիշների համաձայն: Այն ընդդիմադիր ուժերը, որ կհամախմբվեն եվրաինտեգրման գաղափարի շուրջը, կունենան արտաքին քաղաքական աջակցություն: Եթե ունենան նաև հասարակական աջակցություն, կարող են լուրջ մարտահրավեր նետել գործող իշխանությանը: Վստահ եմ, որ այդ դեպքում կրակոցներով խնդիրներ չեն լուծվի: Ես չեմ կարծում, որ ամեն ինչ ավարտվեց:
