ՀՀԿ փոխնախագահ Արմեն Աշոտյանը, նախօրեին, որևէ հստակ պատասխան չի կարողացել տալ լրագրողների այն հարցին, թե պատկերացնո՞ւմ են արդյոք, որ 2018-ից հետո Սերժ Սարգսյանը չի լինի իշխանության մեջ: Արմեն Աշոտյանն անկասկած միակ ՀՀԿ-ականը չէ, որ չի կարող հստակ պատասխան տալ այդ հարցին: Այդ հարցին հստակ պատասխան չի տալիս նույնիսկ այն միակ ՀՀԿ-ականը, որը գուցե գիտե այդ հարցի պատասխանը՝ Սերժ Սարգսյանը:
Ի վերջո Սերժ Սարգսյանն այդ պատասխանից բացի նաև գիտե, և ամենից առաջ գիտե, որ Հայաստանի իշխանությունն այն սուբյեկտը կամ օբյեկտը չէ, որի առաջ հնարավոր է և անվտանգ է բացել որևէ վճռորոշ հարցի պատասխան: Այդ պատասխանն անմիջապես կդառնա Սերժ Սարգսյանի հակառակորդների սեփականությունը, թեև, դեռ պատասխանի կարիք ունի նաև հարցը, թե արդյո՞ք Սերժ Սարգսյանը Հայաստանի իշանության մեջ ունի զինակիցներ կամ թիմակիցներ: Ֆորմալ առումով նա ունի իհարկե կուսակիցների մի հսկա բանակ, սակայն դե ֆակտո կամ իրական քաղաքականության ռեժիմում Սարգսյանը եղել է մենակ, բայց ոչ թե այն պատճառով, որ նրան մենակ են թողել, այլ այն պատճառով, որ մենակ մնալ է ցանկացել հենց նա: Իսկ պատճառը ըստ էության այն է, որ Սերժ Սարգսյանն այդպիսով փորձել է զերծ մնալ որևէ մարտավորությունից և պատրաստ լինել հանուն իշխանության զոհաբերել ցանկացած ֆիգուր:
Մեծ հաշվով նաև հենց այս տրամաբանությունն է պատճառը, որ Սերժ Սարգսյանն առ այսօր չի փորձում բացահայտել իր ծրագրերը 2018-ի հետ կապված, պահելով և նույնիսկ առավել խճճելով ինտրիգը: Բանն այն է, որ որևէ մասով և առավել ևս ամբողջական որևէ սցենարի, սցենարային որևէ տարբերակի, որևէ Ա կա Բ կամ նույնիսկ Գ-Դ պլանի բացահայտում դառնալու է տվյալ սուբյեկտի պաշտպանիչ զրահ: Եթե իշխանության քաղաքական արեալում Սարգսյանը որևէ մեկի համար բացահայտեց իր որևէ պլան՝ թեկուզ փոքր մասով, նա կզրկվի այդ մեկին զոհաբերելու ազատությունից:
Իսկ Սարգսյանը փորձում է մինչև վերջ պահել ցանկացած պահի, ըստ անհրաժեշտության, խաղատախտակի ցանկացած ֆիգուր զոհաբերելու հնարավորությունը: Հենց այդ՝ ցանկացածին զոհաբերելու բացարձակ հնարավորության վրա է նա կարողացել խիստ աննպաստ և գրեթե անհաղթահարելի թվացող մարտահրավերների պարագայում պահել իշխանությունը, այն էլ պրակտիկորեն բացարձակ իշխանությունը:
Իսկ քանի որ Սերժ Սարգսյանը հայտարարել է, որ նախագահի պաշտոնից չի հեռանա մեկ օր իսկ շուտ, ապա դա նշանակում է, որ Սերժ Սարգսյանն անգամ պաշտոնից հեռանալուց մեկ օր առաջ որևէ մեկին չի ասելու, թե ինչ է անելու հաջորդ քայլով:
