Ղազախստանի նախագահ Նուրսուլթան Նազարբաևը ապրիլի 2-3-ին պաշտոնական այցով կլինի Բաքվում: Բանակցություններում քննարկվելու են երկկողմանի համագործակցության մի շարք հարցեր: Փորձագետները նաև չեն բացառում, որ Ադրբեջանի իշխանությունները Ղազախստանից, որը ՄԱԿ ԱԽ-ի ոչ մշտական անդամ է, ակնկալում են աջակցություն Արցախի հակամարտության հարցում՝ գրում է «Նեզավիսիմայա գազետա» թերթը:
Թերթը գրում է, որ Նազարբաևի այցը պետք է կայանար դեռևս անցած տարվա աշնանը: Սակայն պաշտոնական տվյալներով՝ այցը հետաձգվել էր Ղազախստանի նախագահի առողջական խնդիրների պատճառով: Փորձագետներն ասում են, որ Բաքու այցի համար խոչընդոտ է հանդիսացել Երևանում ՀԱՊԿ անդամ պետությունների առջնորդների հանդիպումը, որն անցկացվել է այդ օրերին. Ղազախստանը նպատակահարմար չի գտել մասնակցել այդ հանդիպմանը:
Ռիսկերի գնահատման խմբի տնօրեն Դոսիմ Սատպաևը «Նեզավիսիմայա գազետա»-ին հայտնել է, որ Ղազախստանին բազմիցս մեղադրել են Ադրբեջանի նկատմամբ չափից դուրս համակրանքի համար՝ ի վնաս Հայաստանի շահերի: Բայց Բաքվի համար կարևոր է Աստանայի կողմից բարոյական աջակցությունը արցախյան հակամարտության հարցում՝ առավել ևս հաշվի առնելով Ղազախստանի կարգավիճակը՝ որպես ՄԱԿ ԱԽ-ի ոչ մշտական անդամի:
«Կասկածում եմ, որ Ղազախստանը ուղիղ կմիջամտի արցախյան հակամարտությանը՝ ուղիղ օգնություն տրամադրելու միջոցով: Եթե Բաքվին անգամ ինչ-որ օգնություն ցուցաբերվի, ապա միայն հումանիտար բնույթի: Բայց հարկավո՞ր է դա այժմ Ադրբեջանին: Միակ բանը, ինչ Բաքուն կցանկանար Աստանայից, բարոյական աջակցությունն է, ընդ որում՝ Եվրասիական տնտեսական միության ներսում: Ղազախստանին բազմիցս մեղադրել են այն բանի համար, որ նա ավելի շատ է համագործակցում Ադրբեջանի հետ, որը ՀԱՊԿ և ԵՏՄ անդամ չէ, քան այդ կառույցների որոշ պետությունների հետ: Խոսքը, մասնավորապես, Հայաստանի և Ղրղըզստանի մասին է: Ավելին, որոշ փորձագետներ կոչ են արել Ղազախստանը և Բելառուսը հեռացնել ՀԱՊԿ-ից միայն այն պատճառով, որ նրանք ակնհայտորեն համակրում են Ադրբեջանին»,- ասել է Սատպաևը:
Այդ պատճառով փորձագետը կարծում է, որ Նազարբաևը ճկունություն և զգուշություն կցուցաբերի մի կողմից՝ Ադրբեջանին դիտարկելով որպես ռազմավարական գործընկեր, մյուս կողմից չի անցնի որոշակի սահմանը: