«Ես փորձում եմ անել հնարավորը հավաքականին օգնելու համար: Շատ դեպքերում ստացվում է, լինում են դեպքեր՝ չի ստացվում: Ամեն դեպքում չեմ կարող ինքս միշտ տանել հավաքականին իմ հետևից, տղաները պետք է կարողանան պատասխանատվություն վերցնել և կարողանան փոխարինել ինձ»,- աշխարհի առաջնության ընտրական փուլի Ղազախստանի հետ հանդիպումից հետո ասաց մեր հավաքականի ավագ Հենրիխ Մխիթարյանը:
Կարևորագույն խաղում հաղթեցինք: Հաղթեցինք Մխիթարյանի փայլուն խաղի շնորհիվ: Երկրորդ խաղակեսում Ղազախստանի հավաքականին հաջողվել էր հավասարեցնել խաղը: Հանդիպման 64-րդ րոպեին Մխիթարյանի մասնակցությամբ դրվագը ըստ էության վճռեց հանդիպման ելքը: Հայաստանի հավաքականի ավագը զարգացնելով բարձր արագություն՝ գիտակցաբար գնաց խաղային դուելի ընդդեմ մրցակցի պաշտպան Մալիի:
Շատ ֆուտբոլիստներ այդ դրվագում կխուսափեին բախումից, քանզի մեծ էր վնասվածք ստանալու վտանգը: Առաջ անցնելով պաշտպանից՝ Մխիթարյանն ուժեղ հարված ստացավ, ինչի արդյունքում մրցավարը, երկրորդ դեղին քարտը ցույց տալով Մալիին, Ղազախստանի հավաքականին թողեց 10 ֆուտբոլիստներով: Ստեղծված իրավիճակում մրցակցին ոչինչ չէր մնում անել, քան փորձել պահպանել 0:0 հաշիվը:
Նշենք, որ խիտ պաշտպանության ժամանակ բավական դժվար է կոմբինացիոն գործողություններով արդյունքի հասնել: Հայաստանի հավաքականը մեծացրեց ճնշումը, սակայն խփված գոլը կրկին Մխիթարյանի անհատական գործողության արդյունք էր: Նրա բիլիարդային հարվածը վերջնականապես կոտրեց ղազախական դիմադրությունը: Ընդհանուր առմամբ Հայաստանի հավաքականը ցույց տվեց ակտիվ՝ հարձակողական ֆուտբոլ:
Հանդիպման հենց սկզբում առանցքային խաղացող՝ ձախ կիսապաշտպան Գևորգ Ղազարյանի ծանր վնասվածքը թե՛ տակտիկական և թե՛ հոգեբանական առումով դժվարացրեց խաղը: Նրան փոխարինած Տիգրան Բարսեղյանը սովորաբար գործում է կիսապաշտպանության կենտրոնում: Հայտնվելով ձախ եզրում՝ Բարսեղյանն ակտիվ էր, սակայն զգացվում էր տվյալ դիրքում խաղալու փորձի պակասը: Որոշակի լարվածություն էր նկատվում մեր պաշտպանների գործողություններում, մասնավորապես՝ արագ գրոհներ ձեռնարկելու ժամանակ:
Կարծում ենք՝ եթե Ղազախստանի հավաքականի հետ հանդիպումից առաջ մերոնք ընկերական հանդիպում անցկացրած լինեին, ապա պատկերը բոլորովին այլ կլիներ: Նկատենք, որ այս մրցավեճում հատկապես կիսապաշտպանությունում բացակայում էր այն ֆուտբոլիստը, ով ակտիվ կերպով կհամագործակցեր Մխիթարյանի հետ: Վերջինը ազգային թիմում հատկապես հաջող էր խաղում Ղազարյանի հետ: Մխիթարյան-Ղազարյան խաղային դուետը բազմաթիվ անգամ գոլեր է պարգևել Հայաստանին: Ղազարյանի բացակայության դեպքում Մխիթարյանը փորձում էր խաղալ Մարկոսի հետ: Վերջինը, սակայն, պրակտիկայի պակաս ուներ: Արաս Օզբիլիսի խաղադաշտ դուրս գալուց հետո առկա խնդիրը որոշակիորեն լուծվեց:
Նկատենք նաև, որ կենտրոնական հատվածում հաջող էր գործում Գոռ Մալաքյանը: Վերջինս տեխնիկապես լավ է պատրաստված, և առաջիկայում կարելի է Մալաքյանի միջոցով կիսապաշտպանության գործողություններն էլ ավելի արդյունավետ դարձնել:
Հայաստան-Ղազախստան հանդիպումը երկրորդն էր Արթուր Պետրոսյանի համար: Կարևորագույն այն գործոնը, որը տեսնում ենք մեր մարզչի մոտ, համարձակությունն է և խաղը կառուցելու, ինչպես նաև հարկ եղած դեպքում փոխելու ունակությունը: Թե՛ Մոնտենեգրոյի և թե՛ Ղազախստանի դեմ մրցավեճերում Պետրոսյանին հաջողվեց ճշգրիտ և արդյունավետ որոշումներ կայացնել հատկապես խաղի ընթացքում: Արթուր Պետրոսյանի շնորհիվ այսօր մեր հավաքականն իրական հնարավորություն ստացավ աշխարհի առաջնության եզրափակիչ փուլի ուղեգրի համար պայքարելու:
Այս տուրում Լեհաստանի հավաքականը, մրցակցի հարկի տակ 2:1 հաշվով հաղթելով Մոնտենեգրոյին, 13 միավորով ամրապնդվեց առաջին հորիզոնականում: Ռումինիա-Դանիա մրցավեճում դարպասի գրավում չի արձանագրվել: Այս պահին երկրորդ հորիզոնականում 7 միավորով շարունակում է մնալ Մոնտենեգրոն: Նույնքան միավոր ունի նաև երրորդ տեղում գտնվող Դանիան: Ռումինիայի հավաքականը 6 միավորով 4-րդն է, իսկ Հայաստանը նույնքան միավորով՝ 5-րդը: Ղազախստանը 2 միավորով եզրափակում է մրցաշարային աղյուսակը:
Հաջորդ հանդիպումը Հայաստանի հավաքականը կանցկացնի հունիսի 10-ին՝ հյուրընկալվելով Մոնտենեգրոյին: Հաղթանակի դեպքում երկրորդ տեղի համար պայքարը մեզ համար էլ ավելի իրատեսական կդառնա:
