«Առաջին լրատվականի» դիվանագիտական աղբյուրների տեղեկություններով, ԵԱՀԿ Մինսկի խմբի համանախագահները տարածաշրջան կայցելեն հունիսի առաջին տասնօրյակում:
Մեր աղբյուրների համաձայն` Կազանում նախատեսված Ռուսաստանի, Հայաստանի և Ադրբեջանի նախագահների հերթական հանդիպումից առաջ նախ տեղի կունենա Հայաստանի և Ադրբեջանի արտգործնախարարների հանդիպումը:
Հիշեցնենք, որ մայիսի 26-ին ԵԱՀԿ Մինսկի խումբը համանախագահող երկրների նախագահները` Բարաք Օբաման, Դմիտրի Մեդվեդևը և Նիկոլա Սարկոզին, համատեղ հայտարարություն տարածեցին, որում Հայաստանի և Ադրբեջանի ղեկավարներին կոչ արեցին քաղաքական կամք ցուցաբերել և հունիսին կայանալիք գագաթնաժողովի ընթացքում ավարտին հասցնել կարգավորման հիմնարար սկզբունքների շուրջ աշխատանքը. «Հիմնարար սկզբունքների վերջին տարբերակը, որը քննարկվել է մարտի 5-ին՝ Սոչիում, հիմք է ստեղծում համընդհանուր խաղաղ կարգավորման համար։
Այդ փաստաթուղթը կողմերին հնարավորություն է տալիս հաղթահարել ներկայիս անընդունելի պայմանները»,- ասվում էր հայտարարության մեջ: «Հետագա ձգձգումը միայն հարցականի տակ կդնի կողմերի հանձնառությունը՝ հասնելու համաձայնության:
Երբ համաձայնությունը ձեռք բերվի, մենք պատրաստ ենք վկա լինելու դրանց պաշտոնական ընդունմանը, աջակցել խաղաղ համաձայնագրի մշակմանը և հետագայում մեր միջազգային գործընկերների հետ միասին սատարել դրա կատարմանը»,- նշել էին ԵԱՀԿ ՄԽ-ն համանախագահող երկրների նախագահները:
