Ադրբեջանական APA լրատվական գործակալության փոխանցմամբ, Ադրբեջանի արտգործնախարար Էլմար Մամեդյարովը եվրոպական երկրների խմբի անունից ելույթ է ունեցել Ինդոնեզիայի Բալի կղզում կայացած «Չմիավորման շարժման» 16-րդ կոնֆերանսի ամփոփիչ նիստում։ Այդ նիստն ավարտվել է այսօր։
Իր ելույթում Մամեդյարովը նշել է, որ «Չմիավորման շարժմանը» Ադրբեջանի անդամակցելու արդյունքում իրենք ստանում են լրացուցիչ հարթակ՝ ղարաբաղյան հակամարտության կարգավորման հարցում Ադրբեջանի «արդարացի դիրքորոշումը» միջազգային հանրությանը հասցնելու համար։
Հիշեցնենք, որ Մամեդյարովն Ինդոնեզիա էր մեկնել մայիսի 23-ին՝ մասնակցելու «Չմիավորման շարժման» հիմնադրման 50-ամյակին նվիրված կոնֆերանսին։
«Չմիավորման շարժում» կազմակերպությունը ստեղծվել է 1961 թվականին Բելգրադում: Դրա ստեղծման հիմնական նպատակն այն երկրների միավորումն էր, որոնք չէին ցանկանում անդամակցել ՆԱՏՕ-ին կամ Վարշավյան բլոկին: Այն ուներ 118 անդամ, սակայն Ադրբեջանի ու Ֆիջիի անդամակցության արդյունքում այդ թիվը հասավ 120-ի: