«Ազատություն» ռ/կ-ի փոխանցմամբ` Սերժ Սարգսյանը ՀՀ պաշտպանության նախարար Սեյրան Օհանյանի ուղեկցությամբ ներկա է գտնվել Լեռնային Ղարաբաղի Պաշտպանության բանակի զորավարժություններին, որոնք մեկնարկել են նոյեմբերի 1-ին և շարունակվել մինչև նոյեմբերի 14-ը:
Լեռնային Ղարաբաղի նախագահ Բակո Սահակյանի և բարձրաստիճան սպայակազմի ներկայացուցիչների ուղեկցությամբ նրանք այցելել են պաշտպանական դիրքեր, տեղում ծանոթացել զինված ուժերի մարտական պատրաստությանը, բանակաշինության ընթացիկ աշխատանքներին: Զորավարժություններն ընթացել են Աղդամի մոտակայքում: Այս տարվա զորավարժություններն առանձնանում են ներգրավված զորատեսակների որակով և քանակով:
Սերժ Սարգսյանը ընդգծել է, որ զորավարժությունները պատասխան են սահմանի մյուս կողմում հնչող սպառնալիքներին: «Զորավարժությունները, որ առավելագույնս մոտ էին մարտական իրադարձությանը, պետք է զգուշացում լինի ուրիշների համար. եթե հանկարծ գա ժամը, մենք կարողանալու ենք ոչ թե կրկնել այն, ինչ տեղի ունեցավ 92-94 թվականներին, այլ խնդիրը լուծելու ենք վերջնականապես, հարցը փակվելու է վերջնականապես», – հայտարարել է նա:
Սերժ Սարգսյանը նաև վստահեցրել է, որ ձեռնարկվելու են բոլոր քայլերը` սահմանները անառիկ պահելու ու հայ զինվորի կյանքի անվտանգությունն ապահովելու համար. «Որովհետև շարունակվում են սադրանքները, որովհետև շարունակվում են կրակոցները, զոհվում են մարդիկ, ու ոչ բոլորն են պատշաճ ուշադրության արժանացնում Ադրբեջանի այսպիսի պահվածքը»:
Հիշեցնենք, որ անցյալ շաբաթ Աղդամի շրջանի` Ադրբեջանի կողմից վերահսկվող տարածքներ էր այցելել Ադրբեջանի նախագահ Իլհամ Ալիևը: Նա ևս մեկ անգամ հայտարարել էր, թե պաշտոնական Բաքուն պատրաստ է Ղարաբաղը վերադարձնել ուժով, եթե մոտ ապագայում Հայաստանի հետ խաղաղ բանակցությունները շոշափելի արդյունքներ չտան: Ս.Սարգսյանն անդրադարձել է նաև այս հայտարարություններին` ասելով. «Մենք երբեք չենք ցանկացել պատերազմ, այն ժամանակ ուղղակի պարտադրված էինք պաշտպանել մեր հայրենիքը, հիմա էլ մենք երբեք նախահարձակ չենք լինի, բայց եթե պահը գա, եթե մեզ պարտադրեն, ապա այս անգամ մեր հարվածը պետք է լինի կործանարար և վերջնական»:
Հայաստանի և ԼՂ բարձրաստիճան պաշտոնյաները անցկացրել են պաշտպանական շրջանի դիտարկում, ինչպես նաև Մարտակերտում մասնակցել են Պաշտպանության բանակի 36 սպաների համար կառուցված բնակարանների հանձնման արարողությանը: