«Ծառուկյան» դաշինքում չընդգրկվելուց հետո «Ազգային համաձայնություն» կուսակցությունը որոշում է կայացրել սատարել «Օհանյան-Րաֆֆի-Օսկանյան» դաշինքին: «Մենք նման որոշում ենք կայացրել, իսկ երեկվա դեպքերից՝ Սամվել Բաբայանի ձերբակալությունից հետո մեր որոշումն էլ ավելի է հիմնավորվել: Մենք պատրաստ ենք սատարել ՕՐՕ դաշինքին: Ամեն ինչ պետք է անել, որ այս իշխանությունները փոխվեն: Մենք պետք է իրավիճակ փոխենք, քանի դեռ Սերժ Սարգսյանը չի հասցրել մեկուսացնել, կալանավորել Արցախյան ազատամարտի բոլոր հերոսներին ու ազատամարտիկներին: Սամվել Բաբայանը միամիտ մարդ չէ, որ ցելոֆոնի մեջ փաթաթած հրթիռ բերեր Հայաստան»,-«Առաջին լրատվական»-ի հետ զրույցում ասաց Արամ Հարությունյանը:
Մեր զրուցակցի խոսքով՝ Սամվել Բաբայանի ձերբակալությունը մեկ նպատակ ունի՝ խորացնել հասարակության մեջ առկա վախի մթնոլորտը, որպեսզի մարդիկ չշեղվեն այլ ուղղությամբ: «Խնդիրը միայն Սամվել Բաբայանը չի: Գուցե առաջիկայում փորձ արվի նաև այլ մարդկանց ձերբակալել: Հիմնական նպատակը վախի մթնոլորտ ստեղծելն է, որ մարդիկ չշեղվեն, իսկ քաղաքական ուժերը տեղավորվեն Սերժ Սարգսյանի գծած սահմաններում: Բայց ես հավատացած եմ, որ մեր ժողովուրդը համարձակ, ըմբոստ ժողովուրդ է, և միայն ընտրությամբ հարց չի լուծվելու»,- հավելեց Հարությունյանը:
Մեր հարցին, թե իրենց աջակցությունը ՕՐՕ դաշինքին ի՞նչ ձևով է լինելու, Հարությունյանը պատասխանեց. «Մենք պատրաստ ենք իրենց հետ միասին մասնակցել քարոզարշավին, ելույթներ ունենալ, եթե մեզ տրվի այդպիսի հնարավորություն: Մենք այդ իմաստով խնդիր չենք տեսնում: Մենք համարում ենք, որ այսօր պետք է կանգնել այն ուժի կողքը, որը չի գնա կոմպրոմիսի իշխանությունների հետ մի քանի մանդատի համար: Ես համոզված եմ, որ ՕՐՕ-ն հենց այդ ուժն է»,- նշեց Արամ Հարությունյանը:
Ինչ վերաբերում է խոսակցություններին, թե ինքը նախկին վարչապետ Հովիկ Աբրահամյանի մարդն է և առաջնորդվում է Հովիկ Աբրահամյանի թելադրանքով, Արամ Հարությունյանը արձագանքեց. «Դրանք լուրջ խոսակցություններ չեն: Հովիկ Աբրահամյանը ինքնամոռաց առվակ է, թե ինչ է՝ մեզ դա չի հուզում: Մենք նրա հետ կապ չունենք: Մենք մեր տեղում ենք, և մեր խնդիրն այլ է՝ հեռացնել այս սպառնալիք հանդիսացող իշխանություններին»:
Լուսանկարը՝ Photo Lure-ի