Ռուս մասնագետ Ալեքսանդր Բորոդյուկի գլխավորությամբ Ղազախստանի ազգային հավաքականն առաջին հանդիպումն անցկացրեց Լառնակայում՝ 3:1 հաշվով զիջելով Կիպրոսին: 29-րդ րոպեին հյուրերին Նուսերբաևի հեղինակած գոլի շնորհիվ հաջողվեց առաջ անցնել հաշվի մեջ, սակայն երկրորդ խաղակեսում Կիպրոսն ամբողջովին տիրելով նախաձեռնությանը՝ համոզիչ հաղթանակի հասավ: Աչքի ընկան Միտիդիսը, Կատելարիսն ու Քրիստոֆին:
Այս հանդիպումից հետո Ղազախստանի ընտրանին կժամանի Երևան, որտեղ մարտի 26-ին կմրցի Հայաստանի ազգային հավաքականի հետ: Բորոդյուկի գլխավորած հավաքականը Կիպրոսի դեմ հանդիպումը սկսեց ազգությամբ ղազախ 6 ֆուտբոլիստներով՝ Երկեբուլան Տունգիշբաև, Ասխատ Տագիբերգեն, Բաուրժան Իսլամխան, Ազատ Նուրգալիև, Տանատ Նուսերբաև և Աբզալ Բեյսեբոկով: Երկրորդ խաղակեսում փոխարինման դուրս եկան Դմիտրի Միրոշնիչենկոն, Գրիգորի Սարտակովը, Գեորգի Ժուկովը, Ռոման Մուրտազաևը և Ալեքսեյ Շչետկինը, ինչի հետևանքով խաղադաշտում մնացին ընդամենը երկու ղազախ ֆուտբոլիստներ՝ Ասխատ Տագիբերգեն և Աբզալ Բեյսեբոկովը:
Առաջին խաղակեսում Ղազախստանի հավաքականը ցուցադրեց որակյալ ֆուտբոլ, և թվում էր, թե մեր հավաքականի մրցակիցը երկրորդ կեսում կզարգացնի հաջողությունը: Այսօր համացանցում ֆուտբոլի սիրահարները հիանում են Նուսերբաևի խփած ֆանտաստիկ գոլով: Երկրորդ կեսում Կիպրոսի հավաքականը, մեծացնելով պրեսինգը, ըստ էության քանդեց Ղազախստանի խաղային սխեման: Մասնավորապես, մրցակցի ճնշման հետևանքով Ղազախստանի հավաքականի ֆուտբոլիստները կոպիտ սխալներ էին թույլ տալիս: Ինչ խոսք, սա նաև պրակտիկայի պակասի հետևանք էր: Ղազախստանի առաջնությունը նոր է մեկնարկել, իսկ Կիպրոսի առաջնությունում արդեն 26-րդ տուրն է:
Նշենք, սակայն, որ Կիպրոսի հավաքականը ՖԻՖԱ-ի դասակարգման աղյուսակում զիջում է Ղազախստանին և գտնվում է 114-րդ հորիզոնականում: Ղազախստանի հավաքականն այս պահին 94-րդն է: Հետխաղյա մամուլի ասուլիսի ժամանակ Բորոդյուկի ելույթը վկայում է, որ ռուս մասնագետը հիասթափված է հավաքականի ֆուտբոլիստներից:
«Այս խաղի միակ դրական գործոնն այն էր, որ ծանոթացա խաղացողներին: 60-րդ րոպեից հավաքականի խաղը կտրուկ անկում ապրեց: Շատ էին անհատական սխալները: Միջազգային հանդիպումներում նման վրիպումներն աններելի են: Հուսով եմ, որ մինչև Հայաստանի հավաքականի հետ հանդիպումը կհասցնենք վերականգնվել: Անհրաժեշտ է հոգեբանորեն պատրաստ լինել երևանյան հանդիպմանը: Այս պարտությունը կարող է թևաթափ անել տղաներին, բայց հույս ունեմ, որ նրանք կհամախմբվեն և կմոռանան տեղի ունեցածը»,- ասել է Բորոդյուկը:
Այսօր ղազախական լրատվամիջոցները սուր քննադատության են ենթարկել այս երկրի ֆուտբոլի չինովնիկներին: Ղազախստան-Կիպրոս հանդիպումը չի ցուցադրվել Ղազախստանում: Բազմաթիվ լրագրողների կարծիքով՝ Ղազախստանի ֆուտբոլի ասոցիացիայի հրահանգով միտումնավոր ձեռք չի բերվել հանդիպումը ցուցադրելու իրավունքը, որպեսզի երկրպագուները չտեսնեն ազգային թիմի խայտառակ ելույթը:
«Դիտելով Կիպրոսի հետ հանդիպման դրվագները՝ ևս մեկ անգամ համոզվում ենք, որ Երևանում անելիք չունենք: Հավաքականում խայտառակ վիճակ է տիրում»,- գրել է ղազախական «Sports» պարբերականի վերլուծաբանը:
Ի դեպ, վերջին անգամ Ղազախստանի ազգային թիմը հաղթանակ է տարել 2015 թվականի հոկտեմբերի 13-ին Ռիգայում՝ 1:0 հաշվով առավելության հասնելով Լատվիայի նկատմամբ: 2016 թվականին ղազախներն ընդհանրապես ոչ մի հաղթանակ չեն տարել: Աշխարհի առաջնության ընտրական փուլում մեր առաջիկա մրցակիցը վաստակել է 2 միավոր: Ղազախստանի հավաքականին հաջողվել է 0:0 խաղալ Ռումինիայի և 2:2՝ Լեհաստանի հավաքականի հետ: Վերջինի հետ խաղում Ղազախստանը, զիջելով 0:2 հաշվով, երկրորդ կեսում գրագետ և տպավորիչ խաղ ցուցադրեց և կարող էր նույնիսկ հաղթանակի հասնել:
Ղազախստանի հավաքականում այսօր ամենավտանգավոր խաղացողը միակ լեգեոներ Սոլիգորսկի «Շախտյորի» հարձակվող Սերգեյ Խիժնիչենկոն է: Վերջինս Լեհաստանի հետ խաղում դուբլի հեղինակ է դարձել: Ընդհանրապես ղազախները դավանում են, այսպես ասած, չոր, ինչ-որ տեղ նույնիսկ կոպիտ ֆուտբոլի: Ծանր իրավիճակից դուրս գալու համար մեր մրցակիցը Երևանում ըստ երևույթին հարձակողական ֆուտբոլ կցուցադրի՝ փորձելով 3 միավոր վաստակել: Դա հնարավորություն կտա մեր հավաքականին օգտագործելու մրցակցի կիսադաշտում առաջացած ազատ տարածությունները:
