Սեպտեմբերի 2-ին հանրապետության ուսումնական հաստատություններում ազդարարվել է նոր ուսումնական տարին: Խաչատուր Աբովյանի անվան հայկական պետական մանկավարժական համալսարանում այսօր մեկնարկել է 2013-2014 ուսումնական տարին՝ բակալավրիատի 1543 և մագիստրատուրայի 834 առաջին կուրսերի ուսանողների համար ազդարարելով մասնագիտական նվաճումների սկիզբը:
Մանկավարժի մասնագիտությունն ընտրած յուրաքանչյուր ուսանողի համար օրն առավել քան խորհրդանշական էր: Վաղ առավոտից օրվան բնորոշ տրամադրություն էր տիրում համալսարանի բոլոր ֆակուլտետներում: Օրը հատկապես առանձնահատուկ էր առաջին կուրսեցիների համար: Համալսարանի պրոֆեսորադասախոսական կազմը համալսարանի գիտական գրադարանում ողջունեց և բարի մուտք մաղթեց բոլոր առաջին կուրսեցիներին: Բուհի օրհներգի, շնորհավորանքների և բարեմաղթանքների ներքո ուսանողները ոտք դրեցին վերակառուցված, տեխնիկապես համալրված համալսարան: Առաջին կուրսեցիները դիտեցին համալսարանի անցյալի, ներկայի և հաջողությունների մասին պատմող տեսաֆիլմ, որով էլ ամբողջական դարձավ նրանց պատկերացումը 90-ամյա պատմություն ունեցող ուսումնական հաստատության մասին:
Համալսարանի պրոֆեսորադասախոսական կազմն այս տարի եւս համալրվել է հանրապետությունում լայն ճանաչում ունեցող մասնագետներով:
Հիշեցնենք, որ Մանկավարժական համալսարանում ուսման վարձավճարները չեն բարձրացել: