Грузия Online-ի փոխանցմամբ, Վրաստանի նախագահ Միխեիլ Սաակաշվիլին Բաթումում Արդարադատության տան բացման արարողության ժամանակ անդրադարձել է խորհրդարանի նախկին խոսնակ Նինո Բուրջանաձեի սկանդալային հեռախոսազրույցին, որում նա որդու հետ քննարկում է իշխանափոխության պլանների մանրամասները.
«Բուրջանաձեի և նրա համակիրների թիկունքում կանգնած է կայսերական մեծ հավակնություններ ունեցող երկրի (Ռուսաստանի) մեծ բանակը, անվտանգության մեծ ծառայությունը, կաշառքի ու նավթի մեծ պաշարները, ինչից էլ նրանք կորցնում են գլուխները:
Եթե իշխանափոխության պլանների հղացումը վերաբերեր միայն տեղական ոչնչություններին, ապա ես նրանց լուրջ չէի ընդունի: Բայց երբ մենք գիտենք, թե ովքեր են կանգնած այդ պլանների ետևում, լուրջ ենք ընդունում նահանջել չցանկացող այդ ուժերին: Վրաստանում հակահետախուզությունն ու ոստիկանությունը հաջող են գործում»:
Սաակաշվիլին նաև հայտարարել է, որ դեմ է հեռուստատեսությամբ նմանատիպ հեռախոսազրույցների հրապարակմանը:
Հիշեցնենք, որ նույն աղբյուրը մայիսի 19-ին հայտնեց, որ ռուսական հատուկ ծառայությունները և պաշտպանության նախարարության Հարավային ռազմական օկրուգը (ՀՌՕ) 13 միլիոն դոլար են հատկացրել Նինո Բուրջանաձեին ու նրա շրջապատին: Ընդ որում, 7 միլիոն դոլարը հատկացրել են հատուկ ծառայությունները, իսկ 6 միլիոնը` ՀՌՕ-ն:
Բուրջանաձեն այդ գումարը ստացել է Վրաստանում կոնկրետ պլան իրագործելու համար, որի կետերում նշված է՝
ա) անկարգությունների կազմակերպման միջոցով իշխանափոխության իրականացում և իշխանության գլուխ գալ,
բ) արտաքին քաղաքականության ուղղվածության կտրուկ փոփոխություն (հյուսիսային ուղղությամբ), առանց հանրաքվե անցկացնելու՝ ՆԱՏՕ-ին ու եվրոպական կառույցներին անդամակցելու հեռանկարից հրաժարում,
գ) Աբխազիայի և Հարավային Օսիայի անկախության ճանաչման նկատմամբ հասարակական կարծիքի նախապատրաստում ապա նաև այդ պետությունների ճանաչում և Վրաստանի կազմ դրանց վերադարձից վերջնական հրաժարում,
դ) նոր իշխանության առանցքային պաշտոններում (հատկապես արտաքին գործերին ու անվտանգությանն առնչվող) Կրեմլի առաջարկած թեկնածուների նշանակում:
