Սիրիական իրավիճակը բարենպաստ է Մոսկվայի համար. ռուս առաջնորդներին ձեռնտու է ԱՄՆ-ի կողմից նոր պատերազմ սանձազերծելը, որը նրանք չեն կարող հաղթել՝ ասվում է The Financial Times-ում հրապարակված ռուս քաղաքագետ Գեորգի Միրսկիի սյունակում:
«Մեր (ռուս) առաջնորդները միայն ուրախ կլինեն, որ ԱՄՆ-ը պատերազմ սկսի, որը չի կարող հաղթել»,- կարծում է սյունակագիրը:
Ներխուժման բոլոր հնարավոր տարբերակներից ամենահավանականը հրթիռային հարվածներն են: Օդային ռմբակոծությունները կհանգեցնեն միայն օդաչուների կորուստների, իսկ ցամաքային հարվածների մասին խոսք լինել չի կարող:
«Որքան շատ արևմտյան տերություններ ներգրավվեն հակամարտության մեջ, այնքան մեծ հնարավորություններ կունենա Ռուսաստանը՝ աջակցելու Ասադի ռեժիմին՝ որպես հարվածի տակ գտնվող օրինական իշխանության»,- ասվում է հոդվածում:
Հեղինակը կարծում է, որ նույնիսկ Ասադի ռեժիմի տապալումը հիմք չի դառնա Պուտինին «անհաջողակ» անվանելու:
Հոդվածագիրը նշում է, որ այդ դեպքում պաշտոնական Կրեմլի հաղորդագրությունն այսպիսին կլինի. «Մենք արեցինք հնարավոր ամեն ինչ, որպեսզի օգնենք սիրիացի ժողովրդին նրանց դեմ պայքարում, ովքեր որոշել էին պարտադրել իրենց կամքն ու տապալել կառավարությունը: Մենք հավատարիմ ենք մնացել մեր սկզբունքներին, սակայն ինչ կարող ես անել Արևմուտքի միացյալ ուժերի, Թուրքիայի և Սաուդյան Արաբիայի դեմ: Ամերիկան մեկ անգամ ևս ցուցադրեց իր իրական, անճոռնի դեմքը»:
