«Եվրամիությունը տարբեր երկրներից կազմված կառույց է և դժվար թե միայն Ֆրանսիային վստահի ներկայացնել ԵՄ-ը այս տարածաշրջանի ամենակարևոր հակամարտության կարգավորման խնդրում: Կարծում եմ՝ ԵՄ-ն կարող է այս տեսանկյունից լրացուցիչ ռեսուրսներ ներմուծելու կարիք ունենա»,- «Առաջին լրատվականի» հետ զրույցում անդրադառնալով ԵՄ որոշմանը՝ ընդլայնելու իր ներգրավվածությունը ԵԱՀԿ Մինսկի խմբում, կարծիք հայտնեց ԼՂՀ նախկին արտգործնախարար Արման Մելիքյանը:
Մելիքյանը նշեց, որ Ֆրանսիան ԵՄ միջուկը կազմող ֆրանս-գերմանական ոչ ֆորմալ ընկերակցության տեսանկյունից է ներկայացված ՄԽ-ում, սակայն պետք է հաշվի առնել, որ ԵՄ-ն իր կազմում ունի այնպիսի խոշոր պետություններ, ինչպիսիք են Մեծ Բրիտանիան, Իտալիան. «Գնալով այս պետություններն ավելի մեծ շահագրգռվածություն կարող են ունենալ մեր տարածաշրջանում տեղի ունեցող իրադարձություններում: Չեմ բացառում նաև, որ սա ԵՄ-ում որոշակի տարաձայնությունների դրսևորման արդյունք է»:
Մինսկի խմբի ձևաչափը փոխելու ԵՄ քայլի հնարավոր հետևանքները ԼՂ հարցի կարգավորման վրա, ըստ Մելիքյանի, այս պահին դժվար է կանխատեսել. «ԵՄ-ն, մեծ հաշվով, վարչական կազմակերպության մի ձև է: Առայժմ ՄԽ-ում Եվրոպան ներկայացված էր պետության միջոցով, այժմ կազմակերպության միջոցով է ի հայտ գալու. թե կազմակերպության ներսում ուժերի հավասարակշռությունը ինչպիսին կլինի, կամ որ պետությունները կփորձեն ավելի ակտիվ դերակատարում ունենալ, կամ ինչ որոշումներ կկայացնեն՝ դեռևս հարց է»:
Այդուամենայնիվ, Մելիքյանն ընդգծեց. «Բացառված չէ, որ այս փոփոխության արդյունքում ԵՄ ներսում ուժեղանա պրոադրբեջանական դիրքորոշումը»:
