Հայաստանը հնարավոր է ներկայացուցիչ ունենա բասկետբոլի հեղինակավոր Միացյալ ՎՏԲ լիգայում: Այս մասին հայտարարել է Ռուսաստանի հավաքականի կազմում Եվրոպայի եռակի չեմպիոն դարձած, ՎՏԲ լիգայի գործադիր տնօրեն Իլոնա Կորստինը: Մասնավորապես, անդրադառնալով լիգայի հաջորդ մրցաշրջանին, Կորստինը ասել է. «Հաջորդ մրցաշրջանին մասնակցելու հայտեր ենք ստացել Հայաստանից, Վրաստանից, Շվեդիայից և Չեխիայից: ՎՏԲ լիգային մեծ թվով երկրներ են ցանկանում մասնակցել, սակայն Եվրալիգայի և ՖԻԲԱ-ի միջև առկա կոնֆլիկտը խանգարում է դրան»: Կորստինի հայտարարության վերաբերյալ «Առաջին լրատվական»-ը զրուցեց Հայաստանի բասկետբոլի ֆեդերացիայի գլխավոր քարտուղար Արթուր Նազարյանի հետ:
-Ինչպե՞ս կմեկնաբանեք Կորստինի հայտարարությունը հայկական կողմի հեղինակավոր մրցաշարին հնարավոր մասնակցության վերաբերյալ:
– Հավանաբար տեղյակ եք, որ «Ուրարտուն» Հայաստանի բասկետբոլի ֆեդերացիայի նախագծերից է, քանի որ այսօր Հայաստանում չկա որևէ պրոֆեսիոնալ բասկետբոլային ակումբ: Նախորդ տարի փորձեցինք հանդես գալ Ռուսաստանի Սուպերլիգա-1-ում, որտեղ բախվեցինք բազմաթիվ խնդիրների և դադարեցրինք ելույթները առաջնության մեկնարկից 2 ամիս անց: Այժմ ցանկություն կա հանդես գալու ՎՏԲ լիգայում, որտեղ լրիվ այլ իրավիճակ է, և մասնակից ակումբների նկատմամբ լրիվ այլ մոտեցում կա: Միաժամանակ այս լիգայում հանդես գալու համար հարկավոր է ունենալ շատ ավելի ուժեղ ակումբ, քան նախորդ տարվա «Ուրարտուն» էր: Ներկայումս բանակցություններ ենք վարում մի շարք ընկերությունների և անհատների հետ, ովքեր հետաքրքրված են «Ուրարտու»-ով: Մինչև ապրիլ ամեն ինչ հստակ կլինի:
– Ի՞նչ տարբերություն կա ՎՏԲ լիգայի և Սուպերլիգայի միջև: Արդյո՞ք նույն խնդիրները չեն առաջանա:
– Կան մի քանի շատ կարևոր տարբերություններ: Նախ՝ Սուպերլիգա-1-ում կա մուտքավճար, որը կազմում է շուրջ 80 հազար ԱՄՆ դոլար: ՎՏԲ լիգայում մուտքավճար չկա: Սուպերլիգա-1-ում մեզ պարտադրեցին գնել նաև մրցակից թիմերի ավիատոմսերը, ինչը 70-80 հազար դոլարի վնաս էր բյուջեին: ՎՏԲ լիգայում ևս չկա նման բան: Ստացվում է, որ շուրջ 150-160 հազար ԱՄՆ դոլար խնայում ես, ինչը քիչ չէ: Սուպերլիգա-1-ում խաղում էինք միայն մենք և ռուսական 12 թիմեր: Մրցավարները միայն ռուսաստանցի էին, և հատկապես արտագնա խաղերում լուրջ դժգոհություններ ունեցանք մրցավարության մասով: ՎՏԲ լիգային մասնակցում են մի քանի երկրների ակումբներ՝ Ռուսաստան, Բելառուս, Էստոնիա, Լատվիա, Ղազախստան… Մյուս տարի պետք է միանան նաև Վրաստանը, Ֆինլանդիան, ինչպես նաև Շվեդիան: Մրցավարներն էլ լինելու են չեզոք երկրներից, ուստի այս առումով ևս խնդիրներ չկան: Սուպերլիգա-1-ի հանդիպումները հեռուստաընկերություններին չեն հետաքրքրում, իսկ ահա ՎՏԲ լիգան հեռարձակվում է բազմաթիվ երկրներում և մեծ պահանջարկ ունի, ինչը մեծ հնարավորություններ է բացում ակումբների համար: Սուպերլիգա-1-ում կարող էինք ունենալ միայն 2 լեգեոներ և 1 նատուրիլիզացված խաղացող: ՎՏԲ լիգայում 6 լեգեոների հնարավորություն կա: Սրանք հիմնական տարբերություններն են, սակայն այս շարքը կարելի է շարունակել…
– Տեղեկություն ունե՞ք ՎՏԲ լիգային մասնակցող թիմերի բյուջեի և ծախսերի վերաբերյալ:
– Վերջին տարիներին ակումբների բյուջեները կրճատվում են: Իհարկե, այսօր լիգայում կան թիմեր, որոնք ունեն ահավոր մեծ ֆինանսական միջոցներ, սակայն կան նաև համեստ ակումբներ՝ 1-2 մլն դոլար բյուջեով: Պետք է նկատել, որ խաղացողների աշխատավարձերը վերջին տարիներին նվազել են, քանի որ բարձրակարգ բասկետբոլիստների թիվը գնալով ավելանում է, իսկ ակումբները չեն շատանում…
– «Ուրարտուի» նախորդ տարվա կազմից քանի՞ բասկետբոլիստի խաղամակարդակն է թույլ տալիս ելույթ ունենալ ՎՏԲ լիգայում:
– Թիմի ավագ Ամիրան Ամիրխանովը, ինչպես նաև Վիկտոր Ուսկովը նախկինում հանդես էին եկել ՎՏԲ լիգայում: Մեր թիմում հանդես եկած լեգեոներներն էլ բարձր կարգ ունեն: Ամեն դեպքում սա մարզչական շտաբին առնչվող հարց է: ՎՏԲ լիգայում հանդես գալու ցանկություն ունեն մեծ թվով արտասահմանցիներ: Սա շատ հեղինակավոր և ուժեղ լիգա է:
– Կարելի է ասել, որ «Ուրարտուի» հնարավոր մասնակցությունը նման մրցաշարի «բում» կառաջացնի մեր երկրում:
– Ներկայումս Հայաստանը կտրված է համաշխարհային սպորտում տեղի ունեցող գլխավոր իրադարձություններից: Կան հայ մարզիկներ, որոնք պատվով են ներկայացնում Հայաստանի եռագույնը, սակայն թիմային մարզաձևերում տեղի ունեցող որևէ մրցաշարի հայկական որևէ ակումբ չի մասնակցում, հետևաբար Հայաստանի տարածքում միջազգային հանդիպումներ գրեթե տեղի չեն ունենում, իսկ հեռուստատեսությամբ հայ մարզասերները հետևում են բացառապես արտասահմանյան ակումբների մրցելույթներին: «Ուրարտուն» ՎՏԲ լիգային մասնակցելու դեպքում զգալիորեն կշտկի իրավիճակը, քանի որ առաջնության մասնակիցներն անցկացնում են առնվազն 30 հանդիպում, որից 15-ը՝ սեփական հարկի տակ: Գրեթե ամեն շաբաթ հայ մարզասերների ուշադրությունը բևեռված կլինի հայկական ակումբի ելույթի վրա՝ լինի դա Երևանում, թե արտասահմանում: Սա ազգային նախագիծ է, որի շուրջ համախմբել ենք մի շարք անձանց: Մնում է, որ վերջնական պայմանավորվածություններ ձեռք բերենք և գնանք առաջ:
Հ.Գ. Միացյալ ՎՏԲ լիգայի հաջորդ խաղարկությունը կմեկնարկի 2017 թվականի հոկտեմբերին և կանցկացվի աշուն-գարուն մրցակարգով:
