ԱՄՆ-ը 5 մլն դոլար պարգևատրում կտա ահաբեկիչ Դոկու Ումարովի մասին տեղեկություն հայտնողին, ասված է ռուս-ամերիկյան համատեղ հայտարարության մեջ, որն ընդունվել է նախագահներ Դմիտրի Մեդվեդևի և Բարաք Օբամայի այսօրվա հանդիպման արդյունքում: Այս մասին հաղորդում է Associated Press գործակալությունը
«Մենք հաստատում ենք գլոբալ անվտանգության մեր ընդհանուր սպառնալիքները, որը գալիս է «Ալ-Քաիդայից», և համատեղ հանդես ենք գալիս, որպեսզի արգելափակենք նրանց գործունեությունը, վերացնենք ենթակառուցվածքները և պարտության մատնենք այդ ահաբեկչական խմբավորմանը»,- ասված է հայտարարության մեջ:
«Այսօր ԱՄՆ-ը Դոկու Ումարովին ներառում է «Արդարությանն աջակցելու համար պարգևատրման» ազգային ծրագրի մեջ, որը թույլ կտա հայտնաբերել այդ շատ կարևոր և առանցքային ահաբեկչին, որն ստանձնել է Մոսկվայի մետրոպոլիտենի, 2009թ.-ին Սանկտ Պետերբուրգ-Մոսկվա երկաթուղու, ինչպես նաև «Դոմոդեդովո» օդանավակայանում իրականացված ահաբեկչությունների պատասխանատվությունը»,- ասված է համատեղ հայտարարության մեջ: Այս մասին հաղորդում է BBC-ն:
Ֆրանսիայի Դովիլ քաղաքում տեղի ունեցող հանդիպման ժամանակ երկու երկրների առաջնորդները պայմանավորվել են «անվտանգության ապահովման համար հիմնավոր ջանքեր գործադրել», ինչպես նաև «համակարգել և միավորել իրավապահ մարմինների ջանքերը»:
