Грузия Online-ի փոխանցմամբ, Վրաստանի արտաքին գործերի նախարարությունում կայացել է տնտեսական, առևտրային և իրավական հարցերով Վրաստան-ԵՄ համագործակցության ենթակոմիտեի 10-րդ հանդիպումը:
Վրացական կողմից այն նախագահել է արտգործնախարարության եվրաինտեգրման դեպարտամենտի տնօրեն Տեա Ախվլեդիանին, իսկ եվրոպական կողմից՝ Եվրահանձնաժողովի ներկայացուցիչ Լյուկ Պիեռ Դևինը:
Հանդիպմանը մասնակցել են նաև Վրաստանի, Եվրահանձնաժողովի, ԵՄ-ի արտաքին գործողությունների ծառայության համապատասխան գերատեսչությունները և Վրաստանում ԵՄ-ի պատվիրակությունը:
Հանդիպման ժամանակ կողմերը քննարկել են վերջին մեկ տարվա ընթացքում տնտեսական և առևտրային ոլորտներում Վրաստանի կառավարության իրականացրած բարեփոխումներն ու միջոցառումները:
Դրանք մասնավորապես վերաբերում են մակրոտնտեսության զարգացման, ներդրումների, հարկային ու մաքսային ոլորտներում համագործակցության խթանմանը: Հատուկ ուշադրություն է դարձվել ԵՄ-ի հետ ազատ առևտրի համաձայնագրին առնչվող թեմաներին:
