Եվրահանձնաժողովի երեկ ընդունած «Նոր պատասխան փոփոխվող Հարևանությանը» փաստաթղթում նշված է, որ Եվրամիությունը պատրաստ է քայլեր ձեռնարկել՝ ընդլայնելու իր ներգրավվածությունը այն ձևաչափերում, ուր դեռ ներկայացված չէ, օրինակ՝ ԵԱՀԿ Մինսկի խմբում: Փաստացիորեն ԵՄ-ն ցանկանում է անմիջականորեն ներգրավվել ՄԽ գործունեությանը, այլ ոչ՝ Ֆրանսիայի միջնորդությամբ:
ԼՂՀ նախագահի մամուլի խոսնակ Դավիթ Բաբայանն «Առաջին լրատվականի» հետ զրույցում նշեց, որ առաջին անգամ է Եվրամիությունը նման լուրջ հայտարարություն անում և պետք է սպասել, քանզի ակնհայտ է, որ այն զարգացումներ կունենա:
«Մինչ այժմ ԵԱՀԿ Մինսկի խմբի ձևաչափի որևէ փոփոխության մասին խոսք չէր գնում. իհարկե ի սկզբանե որոշակի փոփոխություններ եղել են, բայց վերջին շրջանում ՄԽ-ը եռանախագահ էր»,- մանրամասնեց Բաբայանը:
Բաբայանը նկատեց, որ դեռևս հարց է, թե Ֆրանսիային փոխելով ԵՄ-ն ինչ ձևաչափ է առաջարկելու, կողմերի համաձայնությունն այստեղ պե՞տք է, թե՞ ոչ. «Սա ոչ միայն տեխնիկական, այլև աշխարհաքաղաքական խնդիրներ են և այդքան հեշտ չէ եղածը մեկ ստորագրությամբ փոփոխության ենթարկել»:
Դավիթ Բաբայանի գնահատմամբ՝ ԵՄ-ն պատրաստակամ է ինչ-որ դերակատարություն ունենալ և ժամանակը ցույց կտա, թե ինչքանով է ԵՄ-ն պատրաստ նման առաքելություն ստանձնելուն: Ըստ Բաբայանի, ի սկզբանե ԵՄ-ն պետք է այնպես անի, որ վերականգնվի բանակցությունների խեղաթյուրված ձևաչափը. «Քանի դեռ իրական ձևաչափը վերականգնված չէ, ԵՄ-ն լինի, Ֆրանսիան, թե Մեծ Բրիտանիան, չեմ կարծում, որ ԼՂ հարցում էական ինչ-որ փոփոխություն տեղի ունենա»: