Грузия Online-ի փոխանցմամբ Վրաստանի ՆԳՆ տեղեկատվական-վերլուծական դեպարտամենտի ղեկավար Շոթա Ուտիաշվիլին հայտարարել է. «Թբիլիսիի կենտրոնում ընդդիմության ցույցի ցրման ժամանակ ձերբակալվել է 90 մարդ: Նրանց բոլորի նկատմամբ որպես խափանման միջոց ընտրվել է երկամսյա կալանքը:
Զոհված երկու անձանց կապակցությամբ տարվում է հետաքննություն: ՆԳՆ-ը նաև տարածել է մի աուդիո ձայնագրություն, որում Բուրջանաձեն իր որդու` Անզորի հետ մանրամասն քննարկում է Վրաստանում իշխանափոխության պլանները` նախապատվությունը տալով եգիպտական սցենարին:
Բացի այդ, Բուրջանաձեն որդուն հարցրել է, թե արդյոք անհրաժեշտության դեպքում հատուկ նշանակության Կոջորի գումարտակը պարաստ է կրակել ցուցարարների վրա, ինչին ի պատասխան Անզոր Բիցաձեն նշել է. «Առաջին հարձակումը մենք հետ կմղենք, իսկ հետո թող գործ ունենան Գլխավոր հետախուզական վարչության (ԳՀՎ) հատուկջոկատայինների հետ»:
Նրանք նաև քննարկել են այն հարցը, թե ցուցարարներից քանի՞սն ունի ռուսամետ դիրքորոշում և նրանցից քանիսի՞ վրա կարելի է հաշվարկ անել:
Հիշեցնենք, որ Վրաստանի նախագահ Միխայիլ Սահակաշվիլին նույնպես հակված է վրաստանյան վերջին զարգացումներում ռուսական հետքի առկայությանը: