Լրագրողները երկու օր է, ինչ արդարադատության նախարար Հրայր Թովմասյանից փորձում են հետաքրքրվել, թե արդյո՞ք համաներման մասին որոշումը Մարտի 1-ի իրադարձությունների ժամանակ ազատազրկված բոլոր ընդդիմադիր գործիչների վրա կտարածվի «Եթե կոնկրետ նկատի ունեք Սասուն Միքայելյանին և Նիկոլ Փաշինյանին, ապա այս համաներումը նրանց վրա կտարածվի և պետք չէ մտավարժանքների մեջ ընկնել»,-այսօր խորհրդարանում լրագրողների հետ զրույցի ժամանակ հայտարարեց արդարադատության նախարար Հրայր Թովմասյանը:
Հրայր Թովմասյանը նաև տեղեկացրեց, որ համաներման մասին որոշումն ուժի մեջ կմտնի հրապարակման հաջորդ օրը: Որոշումը կհրապարակվի 24 ժամվա ընթացքում: «Կարծում եմ, որ այսօր էլ միգուցե կհասցնենք հրապարակել, եթե չհասցնենք, վաղը կհրապարակվի և դա նշանակում է, որ մյուս օրը կմտնի ուժի մեջ: 24 ժամն սկսվեց այն պահից, երբ ԱԺ-ն որոշում կայացրեց: 1 ժամ է անցել, 23 ժամ դեռ ունենք»,-նկատեց նախարարը:
Անդրադառնալով համաներման ժամկետներին` Հրայր Թովմասյանն ասաց, որ դրանք պայմանավորված են Առաջին և Երրորդ հանրապետության անկախության օրերով: «Եթե որոշումը վաղը հրապարակվի, ուժի մեջ կմտնի մայիսի 28-ին, իսկ կիրառման ժամկետը մինչև սեպտեմբերի 21-ն է: Այս ժամանակահատվածում է, որ ՔԿՀ-ները, նախաքննության մարմինները պետք է քննության առնեն և տվյալ անձանց նկատմամբ կիրառելու մասին որոշում կայացնեն»: Իսկ այն հարցին, թե արդյոք մինչև ընդդիմության հանրահավաքը Սասուն Միքայելյանն ու Նիկոլ Փաշինյանն ազատության մեջ կհայտնվեն, Հրայր Թովմասյանը պատասխանեց. «Որոշակի տեխնիկական ընթացակարգեր են և պետք է նայել, թե արդյոք հնարավոր է այդ ամբողջը հասցնել: Ցանկացած ձգձգում, ոչ միայն տվյալ անձանց հետ, կոռուպցիոն ռիսկեր է պարունակելու, բացառելու է այն դեպքերը, երբ անձին մեկ օր շուտ բաց թողնելը պետք է զարտուղի ճանապարհներով լինի: Ավել օրվա երկարելը չարաշահման տեղիք է տալու, և նույնիսկ այդ մարդիկ են որոշ դեպքերում, ցավոք սրտի, պատրաստ լինելու գնալ այդ քայլին մեկ-երկու ամիս շուտ դուրս գալու համար»,-հավելեց Հրայր Թովմասյանը:
Հիշեցնենք, որ 1-ին անգամ «Առաջին լրատվականն» ու «Ժամանակ» օրաթերթն էին տեղեկացրել, որ «քրեակատարողական հիմնարկներում համաներման ենթակա բանտարկյալներին բնութագիր տալու համար կոռուպցիոն գործողություներ են սկսվել և բնութագրի ստվերային ընդհանուր արժեքը հասնում է 1000 դոլարի»:
