Մայիսի 25-ին եթեր է հեռարձակվել լեգենդար Օփրա Ուինֆրիի շոուի վերջին հաղորդումը: Օփրան այս անգամ հյուր չուներ, իսկ նրա վերջին հյուրը հենց ինքն էր՝ Օփրան: Այս մասին հաղորդում է Associated Press գործակալությունը:
Նա հրաժեշտ է տվել իր ծրագրին, որը վարել է 25 տարի շարունակ: Նրա ելույթն ուղեկցվել է արխիվային կադրերի ցուցադրությամբ և երաժշտությամբ, որը հատուկ այս առիթի համար գրել էր կոմպոզիտոր Թոլ Սայմոնը: Այնուհետև Օփրան անձամբ դահլիճում սեղմել է բոլորի ձեռքը:
Օփրայի շոուն մեծ համբավ է բերել հայտնի հաղորդավարուհուն: 1986 թվից ABC հեռուստաալիքով հեռարձակվող հաղորդումն ամենասիրվածներից է ԱՄՆ-ում: Forbes ամսագիրը նրան դասում է աշխարհի ամենահարուստ և ազդեցիկ կանանց թվին` նրա կարողությունը գնահատելով 2.7 մլրդ դոլար:
