Նախօրեին հայտնի դարձավ, որ պրոֆեսիոնալ բռնցքամարտի կիսամիջին քաշային կարգում WBA վարկածով չեմպիոն, Ռուսաստանը ներկայացող Դավիթ Ավանեսյանը տիտղոսի պաշտպանության համար հերթական մենամարտը կանցկացնի: Նրա մրցակիցն է այս քաշային կարգում աշխարհի նախկին չեմպիոն՝ ամերիկացի Լամոնտ Պիտերսոնը: Մենամարտը կկայնա փետրվարի 18-ին՝ Օհայո նահանգի Ցինցինատի քաղաքում: Նշենք, որ բռնցքամարտում բացառիկ երեւույթ է, երբ նման դիմակայության մասին հայտարարվում է մենամարտից ընդամենը երեք շաբաթ առաջ: 33-ամյա Պիտերսոնը պրոֆեսիոնալ ռինգում 34 հաղթանակ է տարել, կրել երեք պարտություն եւ մեկ անգամ մարտն ավարտել ոչ ոքի: Ավանեսյանը, մինչեւ 2016 թվականի հոկտեմբերը կրում էր աշխարհի ժամանակավոր չեմպիոնի տիտղոսը, սակայն նոյեմբերին WBA-ն հայտարարեց, որ հայազգի բռնցքամարտիկի կոչումը բարձրացել է եւ նա աշխարհի լիարժեք՝ կանոնավոր չեմպիոն է: Պիտերոսնի հետ մենամարտում խաղարկվելու է աշխարհի կանոնավոր չեմպիոնի կոչումը: Առաջիկա մենամարտի վերաբերյալ Ավանեսյանը տպավորություններով կիսվել է երկրպագուների հետ հանդիպման ժամանակ:
-Լամոնտ Պետերոսնը հայտնի բռնցքամարտիկ է, սակայն աչքի է ընկնում ոչ այնքան դիտարժան մարտերով: Նա բավական անհարմար մրցակից է: Ինչո՞ւ որոշեցիք մենամարտել նրա հետ եւ ինչո՞ւ մենամարտից ընդամենը երեք շաբաթ առաջ հայտարարվեց դիմակայության կայացման մասին:
-Այո, Պիտերոսնը անհարմար մրցակից է: Բայց չէի ասի, որ նա ձանձրալի ոճով է մենամարտում: Մեզ առաջարկեցին հանդիպել ռինգում եւ մենք անմիջապես համաձայնվեցինք: Բանակցությունների փուլում շատ խոսակցություններ էին շրջանառվում մենամարտի անցկացման մասին: Մենք սպասեցինք վերջնական որոշմանը եւ նոր հանդես եկանք հայտարարությամբ: Կարծում եմ՝ մարզասերները ականատես կլինեն դիտարժան եւ գրավիչ մենամարտի: Թե՛ իմ, եւ թե՛ Պիտերսոնի համար սա հիանալի առիթ է տիտղոս նվաճելու համար:
-Որտե՞ղ եք նախապատրաստվում Պիտերոսոնի հետ մարտին: Կա՞ հնարավորություն նախապատրաստական փուլում աշխատելու Քել Բրուքի հետ:
–Հիմնական մարզումները անց եմ կացնում Անգլիայում: Ցավոք, Բրուքը չի օգնում ինձ, քանզի վայելում է հագիստը: Նշեմ սակայն, որ ինձ օգնում են բազմաթիվ պրոֆեսիոնալ բռնցքամարտիկներ եւ մարզիչներ: Ամեն ինչ կարգին է, կարծում եմ՝ երկրպագուներիս չեմ հիասթափեցնի: Իմ ելույթներով հետաքրքրված են ոչ միայն Ռուսաստանում այլեւ Հայաստանում եւ ԱՄՆ-ում: Ամեն մի հաղթանակից հետո մեծանում է հետաքրքրությունը մենամարտերիս նկատմամբ, ուստի մեծանում է նաեւ պատասխանատվությունը:
-Նախորդ մենամարտում Դուք փայլուն ոճով հաղթեցիկ բռնցքամարտիկ՝ լեգենդ Շեյն Մոզլիին: Կարելի՞ է ասել, որ այս հաղթանակը նոր ուժեր հաղորդեց եւ մեծացրեց վստահությունը սեփական ուժերի նկատմամբ:
-Այո, իհարկե: Երբ հաղթում ես լեգենդար բռնցքամարտիկի՝ ուժեղանում ես ոչ միայն ֆիզիկապես այլեւ հոգեբանորեն: Կարող եմ ասել, որ այս հաղթանակի շնորհիվ բռնցքամարտի աշխարհում հայտնվեցի մի նոր հարթության վրա: Բռնցքամարտում եւ ընդհանրապես պրոֆեսիոնալ սպորտում չի կարելի ապրել հաղթանակով եւ մտածել, որ մեծ բարձունքի ես հասել: Ես շարունակում եմ աշխատել եւ չեմ բավարարվել ձեռք բերած արդյունքով: Պետք է ձգտեմ նոր տիտղոսներ նվաճել: Գերնպատակս Տուրմանին հաղթելն է, սակայն դեռ պարզ չէ՝ երբ կկայնա այդ մենամարտը:
Նշենք, որ այս քաշային կարգում աշխարհի սուպերչեմպիոնը ամերիկացի Կիտ Տուրմանն է, ով պրոֆեսիոնալ ռինգում անցկացրած բոլոր 27 մենամարտերում հաղթանակ է տարել: Տուրմանը, սակայն, խուսափում է Ավանեսյանի հետ մենամարտից, չնայած՝ կողմերին շարունակ հորդորում են հանդիպել ռինգում: Ավանեսյանը 22 մենամարտ է տարել պրոֆեսիոնալ ռինգում ՝ կրել մեկ պարտություն եւ մեկ մենամարտ ոչ ոքի ավարտել:
