Աշխատանքային այցով Սյունիքում գտնվող էներգետիկայի եւ բնական պաշարների նախարար Արմեն Մովսիսյանը լրագրողների հետ զրույցում մեկ անգամ ևս անդրադարձավ ուրանի հանքերի շահագործմանը։ Նրա խոսքով, որոշ քաղաքական գործիչներ իրենց քաղաքական PR-ի համար խեղաթյուրում են փաստերը ժողովրդի համար։ «Ուրանի կամ ցանկացած մետաղ արտահանելու համար նախ պետք է իմանալ այդ պաշարների առկայության մասին։ Պետք է իմանալ կարևոր են արդյունաբերական նկատառումներով, ինչ միացություններ ունեն կամ ինչ խորության վրա են»,-ասաց նախարարը։ Կառավարությունը դեռ նման տեղեկատվության չի տիրապետում, ուր մնաց հանքերի շահագործման մասին խոսվի։ Նվազագույնը 2 տարի է պետք ուսումնասիրությունների համար, հետո ևս մի 5 տարի նախնական աշխատանքների ու նոր կարող է խոսք լինալ արդյունահանման մասին։ Ճիշտ է, խորհրդային տարիներին որոշ հետազոտություններ արվել են, սակայն դրանք ընդամենը ուրանի երեւակումներ են եղել: Պատասխանելով այն հարցին, թե ինչպես կվարվեն ուրանի պաշարները հայտնաբերելուց հետո, Արմեն Մովսիսյանը ասաց. «Առաջին հերթին էկոլոգիական տեսանկյունից ենք նայելու։ Հետո էլ, ոչ մի երկիր այնպիսի քայլ չի անի, որը բերի կործանման. նույնը կանենք եւ մենք»,-ասաց Ա. Մովսիսյանը։ Նախարարը, ինչպես միշտ, հիմա էլ հորդորեց խուճապի չմատնվել. ժողովուրդը չի տուժելու։
Նշենք, որ պաշտոնական տեղեկատվությամբ, նախարարն այցելել էր Սյունիք՝ մարզի հանքաարդյունաբերական խոշոր ձեռնարկությունների գործունեությանը, ձեռք բերված արդյունքներին, գալիք տարվա ծրագրերին ծանոթանալու համար։ Նա հանդիպումներ ունեցավ Ագարակի, Քաջարանի եւ Կապանի լեռնահանքային գործարաններում։