Կապանում հակաուրանյան շարժման նախաձեռնող հասարակական կազմակերպությունները այսօր տարածել են հայտարարություն, ըստ որի՝ իրենց հասած տեղեկություններով պատգամավոր Զարուհի Փոստանջյանը Երևանում հայտարարություններ էր անում իր կողմից Կապանում հանրահավաք կազմակերպելու մասին։ Սա էր պատճառը, որ նրանք արգելեցին պատգամավորին ելույթ ունենալ հինգշաբթի կայացած հակուրանյան հանրահավաքում։ Հիշեցնենք, որ երբ պատգամավորը ուզում էր մոտենալ խոսափողին, անջատեցին տեխնիկան։ Պատգամավորը սկսեց առանց խոսափողի ելույթ ունենալ։ Հանրահավաքի մասնակիցների պահանջով նրան խոսափող տրամադրեցին։ Մինչ հայտարարությունը, պատգամավորի ելույթը խոչընդոտող «Վերին Ձոր-Քաջարան» ՀԿ-ի նախագահ Վոլոդյա Աբրահամյանը պատճառաբանել էր, որ ինքը չի ճանաչել պատգամավորին, թե չէ առանց հերթի խոսք կտար։ Հակաուրանյան շարժման նախաձեռնողները իրենց հայտարարության մեջ մեկ անգամ ևս հիշեցնում են, որ «սա քաղաքական պայքար չէ, այլ բնապահպանական»։ «Մեր ամենօրյա աշխատանքի շնորհիվ է, որ մենք կարողացանք այսքան հասունացնել խնդիրը և դեռ ավելի կհասունացնենք, բայց մեզ համար անընդունելի է, որ մեր կատարած աշխատանքը վերագրեին որևէ մեկին և մեզ գործիք դարձնեն։ Մենք թույլ չենք տա ոչ մի քաղաքական ուժի շահարկել այս հարցը և ղեկավարել մեզ, քանի որ մեր պայքարը ազնիվ է։ Հանրահավաքներ կկազմակերպենք այնքան, մինչև կառավարությունը կասեցնի այս գործընթացը»,-ասված է հայտարարության մեջ։