Հնարավոր համագործակցությանն առնչվող հարցեր են քննարկվել Երևանի քաղաքապետ Կարեն Կարապետյանի և Չեխիայի ֆինանսների նախարարության պետական երաշխավորումների դեպարտամենտի պետի Անդրկովկասի գծով առաջին տեղակալ Իրժի Սկուռայի հանդիպման ժամանակ։
Ընդհանուր առմամբ ներկայացնելով մայրաքաղաքային տնտեսության զարգացմանն ուղղված քաղաքապետարանի ծրագրերը, Կարեն Կարապետյանը նշել է, որ քաղաքապետարանը պատրաստ է քննարկել ներդրումային առումով փոխշահավետ բոլոր առաջարկությունները։ Մանրամասնելով մայրաքաղաքում տրանսպորտի ոլորտի կանոնակարգմանն ու զարգացմանն ուղղված նոր հայեցակարգը, քաղաքապետը շեշտել է միկրոավտոբուսները մեծ և միջին տեղատարողության ավտոբուսներով փոխարինելու, ավտոկայանատեղիների ժամանակակից կառավարման, ինչպես նաև վճարման միասնական համակարգի անցնելու անհրաժեշտությունը. «Երևանում ներդրումային տեսանկյունից այսօր բավական բարենպաստ գործարար միջավայր է ձևավորված»,- ընդգծել է քաղաքապետն ավելացնելով, որ քաղաքապետարանը պատրաստ է քննարկել նաև առողջապահական համակարգում ներդրումային ծրագրերի առաջարկություններ։
Իրժի Սկուռան, ներկայացնելով իր ղեկավարած դեպարտամենտի գործունեությունը, նշել է, որ այն բավական խոշոր ծրագրեր է իրկանացնում տարածաշրջանում. «Վստահ եմ, որ Ձեր մոտեցումները կհետաքրքրեն չեխ գործարարներին»,– նշել է Սկուռան, ավելացնելով, որ իր ղեկավարած դեպարտամենտը պատրաստ է քննարկել մասնավորապես ավտոբուսների ներկրման և համաբուժարանների տեխնիկական վերազինմանն ուղղված ծրագրերին մասնակցության հարցը։
Կողմերը պայմանավորվել են աշխատանքային կարգով քննարկել նշված ուղղություններով ծրագրերն ու կոնկրետ առաջարկություն ներկայացնել։
