«Կանանց և տղամարդկանց հավասար իրավունքների և հավասար հնարավորությունների մասին» օրենքում, որն առավել հայտնի է «գենդերային օրենք» անունով, բոլոր բացատրությունները վերցված են Վիքիպեդիայից: Օգոստոսի 20-ին լրագրողների հետ հանդիպմանը նման տեսակետ հայտնեց «Սոցիոմետր» սոցիոլոգիական հետազոտությունների կենտրոնի տնօրեն Ահարոն Ադիբեկյանը՝ միաժամանակ նկատելով, որ այս օրենքն անիմաստ է և վտանգավոր: «Մենք դուրս ենք գալիս բնապատմական պրոցեսից, դառնում պատմական նոր մուտանտ: Սակայն մեր լեզուն միասեռ է, մենք ավանդապաշտ ենք, մեզանում գենդեր չկա. գենդերը պահանջում է հավասարություն ամենուրեք: Մենք արական մշակույթ ենք»,- ասաց նա:
Ադիբեկյանի խոսքերով՝ կինն ունի շրջանակ, որտեղ միայն ինքն է որոշում կայացնում, տղամարդն էլ իր շրջանակն ունի: Օրենքի խնդիրն է՝ անկախ սեռից, եթե անձն ուզում է գրավել այսինչ տարածքը, պետք է գնա և գրավի: Օրենքի ընդունման մեջ Ադիբեկյանը վտանգ չի տեսնում՝ նկատելով, որ եթե մենք լինեինք օրինապաշտ, օրենքներով կարող էինք շատ բան փոխել, բայց մեր պարագայում մտահոգվելու կարիք չկա:
«Ընտանիքը պետք է դիտել կենսաբանական՝ տղամարդու և կնոջ կապ: Երկու համասեռամոլ կարող են ստեղծել ոչ թե ընտանիք, այլ զույգ: Այս պարագայում երեխա որդեգրելը պետք է բացառել: Եթե մայրը դառնում է համասեռամոլ, նրանից երեխային պետք է վերցնել, տանել մանկատուն»,- նշեց նա: Ադիբեկյանը թեև հասկանում է այն մարդկանց, ովքեր ունեն բնածին արատներ, բայց կարծում է, որ նրանք «պետք է իրենց տարածքներում ապրեն և ընդհանուր ջուրը չպղտորեն»:
«Բարեփոխում» ՀԿ-ի նախագահ, ընտանիքի, երեխաների և գենդերային հարցերով նախկին սոցապ փոխնախարար Կարինե Հակոբյանը նշեց, որ գենդերային քաղաքականության խնդիրն անկախության առաջին տարիներից ձևավորվեց և խնդրին լուծում տրվեց: Այն միշտ եղել է օրակարգում: Հակոբյանը գտնում է, որ Հայաստանում չէր խանգարի նման օրենքների գոյությունը, բայց ցավով նշում, որ տարիների ընթացքում ամեն ինչ ենթարկվում է փոփոխությունների, «գենդեր» ձևակերպումը փոխվել է, այն կորցրել է ինքնությունը՝ դառնալով վտանգավոր: «Խնդիրը պետք է դիտարկել համաշխարհայնության և ծայրահեղականության համատեքստում: Ողջ խոսակցությունը սկսվել է ձեռքբերովի բառից, որը զուտ բառ չէ, երևույթ է: Կնոջ և տղամարդու առողջ հարաբերությունների շնորհիվ է, որ ազգը վերարտադրվում է: Ներկայում օրենքներ մշակելիս անտեսված է երեխայի անվտանգությունը. այսպիսով նրանց համար ստեղծվում է էլ ավելի վտանգավոր միջավայր»,- ասաց նա: Հակոբյանը նշեց, որ անընդհատ հղում է արվում միջազգային օրենքներին, իսկ դրանց ուղղվածությունը հայտնի է բոլորին, մինչդեռ պետք է հղում արվի միայն նրանց, որոնք վավերացված են:
«Կանանց և տղամարդկանց հավասար իրավունքների և հավասար հնարավորությունների մասին» օրենքում ներմուծվում է «գենդեր» հասկացությունը, որը սահմանվում է «տարբեր սեռի անձանց` ձեռքբերովի, սոցիալապես ամրագրված վարք, կանանց և տղամարդկանց միջև հարաբերությունների սոցիալական հայեցակետ, որն արտահայտվում է հասարակական կյանքի բոլոր ոլորտներում, ներառյալ քաղաքականությունը, տնտեսությունը, իրավունքը, գաղափարախոսությունը, մշակույթը, կրթությունը, գիտությունն ու առողջապահությունը»:
Լուսանկարը՝ PanARMENIAN Photo-ի
