Վրացական Apsny.ge կայքի փոխանցմամբ, Վրաստանի նախագահ Միխեիլ Սաակաշվիլին հայտարարել է, որ Թբիլիսին պետք է դառնա Եվրոպայի լավագույն մայրաքաղաքներից մեկը.
«Դա մեր առաջնահերթ խնդիրն է: Թբիլիսին, հիրավի, հանդիսանում է աշխարհի ամենագեղեցիկ մայրաքաղաքներից մեկը: Դրա հետ մեկտեղ, Թբիլիսին պետք է այնպիսի քաղաք դառնա, որը հարմարավետ կլինի բնակության համար:
Հաճախ դժգոհություններ են լսվում, որ ավտոբուսների քանակը կրճատվել է, և մարդիկ ստիպված են լինում երկար կանգնել կանգառներում: Ես ինքս մեծացել եմ այս քաղաքում և լավ հիշում եմ, թե ինչպիսի դժվարությամբ էի տնից հասնում դպրոց: Այսօր մենք Թբիլիսիում ունենք մի քանի անգամ ավելի շատ ավտոբուսներ, քան կոմունիստների ժամանակ էր:
Այսօր մենք Թբիլիսիում ներդրում ենք ժամանակակից տրամվայ, որը չունի ո՛չ Բուդապեշտը, ո՛չ էլ Եվրոպայի որևէ այլ քաղաք: Մենք Թբիլիսի ենք բերում նաև էկոլոգիապես մաքուր այլ տրանսպորտ, ինչպիսն է, ասենք, հեծանիվը, որքան որ դա ոմանց համար կարող է զավեշտալի թվալ:
Թբիլիսիի բոլոր շրջաններում կառուցվում են նոր մարզական կենտրոններ, ընդլայնվում է քաղաքի աշխարհագրությունը: Թբիլիսին նաև երկաթուղային հանգույց է: Բացի այդ, վերջին տարիների ընթացքում առաջին անգամ թարմացվել է մետրոպոլիտենի շինարարությունը»:
Հիշեցնենք, որ մայիսի սկզբին Տիլբուրգի համալսարանի պրոֆեսոր Յան վան Դայկը հայտարարեց, որ այժմ Թբիլիսին կարող է համարվել աշխարհի ամենաանվտանգ քաղաքներից մեկը:
